کابل چاپ ورځپاڼو په خپلو نننیو ګڼو کې هم په مسکو کې د افغانستان په اړه د جوړې شوې غونډې او د افغانستان لپاره د روسیې د ځانګړي استازي ضمیر کابلوف د وروستیو څرګندونو په اړه یو شمېر مطالب چاپ کړي دي.
ویسا:
ویسا خپلواکې ورځپاڼې د خپلې نننۍ ګڼې په سرمقاله کې لیکلي؛ د افغانستان لپاره د روسیې د ځانګړي استازي ضمیرکابلوف وروستۍ خبرې د مسکو تر درې اړخېزې غونډې ډېرې سپینې او د یو خطرناک پیغام لرونکې دي.
د سرمقالې لیکوال لیکي:
دا چې مسکو کې د افغانستان سولې په اړه درې اړخېزه غونډه جوړه شوه؛ یوه توجېه یې درلوده، د افغان حکومت د پلاوي نه ګډون په دې غونډه کې یوازې دغه استدلال ته وزن ورکوي چې د غونډې د پرېکړو او اعلامیو عملي اړخ بې وزنه کوي.
خو د سرمقاله لیکونکي په باور د کابلوف وروستۍ خبرې چې افغانستان کې د امریکا نهه لویې پوځي اډې ورته د زغم وړ نه دي عملاً د خطر زنګ دی.
د سرمقاله لیکونکي له نظره، دا یوازې د روسیې دریځ نه دی بلکې د افغانستان څلور ګاونډیو هېوادونو ګډ دریځ دی او له همدې امله دا خبره د پام وړ ده.
انیس:
انیس دولتي ورځپاڼې هم له اناتولي خبري اژانس سره د ضمیرکابلوف د وروستیو څرګندونو ځینې برخې راخیستې دي.
انیس په خپله سرمفاله کې لیکلي؛ کابلوف ویلي، که په افغانستان کې د اقتصاد، مدیریت او پوځ د پیاوړتیا لپاره د نړیوالو هڅو له لارې مرسته ونهشي، دغه هېواد به ښه او روښانه راتلونکې ونهلري او لهمنځه به ولاړ شي.
انیس لیکلي:
کابلوف په دا شان څرګندونو سره نهشي کولای چې د افغانستان د خلکو تر منځ روانې جګړې ته لمن ووهي او دا باید نه یوازې دغه روسي ډیپلوماټ بلکې ټول هېوادونه په پام کې وساتي چې افغانستان داسې هېواد نهدی چې په لږ توپان سره ونړېږي.
اصلاح:
اصلاح ورځپاڼې بیا په خپل یو مطلب کې د افغانستان په اړه د مسکو د غونډې په اړه لیکلي:
د افغانستان خلک د پاکستان تېرو کړنو ته په پام سره له دغه هېواد نه ګیله نهلري خو د روسیې او چین دا شان غیر ډیپلوماټیکو کړنو ته د شک په سترګه ګوري او دا به د افغانستان او دغه هېوادونو تر منځ فاصلې پیدا کړي.
د مطلب لیکونکي لیکلي، د افغانستان د خلکو تمه د نړۍ له هېوادونه دا ده چې د افغانستان په اړه په جوړېدونکو ناستو کې د افغانستان استازیو ته هم بلنه ورکړي.