افغانستان، هند، بنګلهدېش او بوتان اعلان وکړ چې په اسلاماباد کې د سارک یا د جنوبي اسیا د همکارۍ سازمان په غونډه کې ګډون نهکوي.
افغانستان وایي چې سارک یا د جنوبي اسیا غړو هېوادونو په راتلونکې غونډه کې چې په نوومبر کې پهاسلام اباد کې جوړېږي، برخه نهاخلي.
د ولسمشر اشرف غني مرستیال ویاند دوا خان مینهپال چهارشنبه ناوخته ازادي راډیو ته وویل:
"د افغانستان حکومت فیصله کړې ده، څو چې په سیمه کې له امنیتي پلوه ستونزه حل شوې نهوي، افغانستان به په اسلاماباد کې د سارک په جوړېدونکې غونډه کې برخه وانهخلي."
د افغانستان تر دې اعلان څو ساعته مخکې د چهارشنبې په ورځ د بنګلهدېش د بهرنیو چارو وزیر ایم شهریار علم وویل چې د سارک په غونډه کې برخه نهاخلي خو علتیې دا وښود چې د کور دننه بوختیاوې دوی ته اجازه نهورکوي چې د سارک غونډې ته استازي واستوي.
د بنګلهدېش او افغانستان تر پرېکړو یوه ورځ مخکې هند، اسلاماباد کې د سارک غونډه کې ګډون بایکاټ کړ. بوتان هم ویلي دي چې په دې غونډه کې به برخه وانهخلي.
د افغان ولسمشر مرستیال ویاند دوا خان مینهپال که څه هم د سارک په غونډه کې د ګډون علت امنیتي ستونزې یادوي خو د افغانستان د ملي وحدت حکومت اړیکې چې تېر کال له اسلاماباد سره ډېرې ښې وې، روان کال خورا پېچلې شوې دي او دواړه یو بل تورنوي چې ترهګر په خپله خاوره کې د یوه بل پر ضد کاروي.
د جنوبي اسیا غړو هېوادو د همکارۍ سازمان یا سارک بنسټ په ۱۹۸۵ کال کې په دې هدف کېښودل شو چې په سیمه کې اقتصادي همکارۍ زیاتې شي.
افغانستان، پاکستان، هند، بنګلهدېش، بوتان، مالدیف، نیپال او سریلانکا د سارک غړي هېوادونه دي.
اسوشېټېډ پرېس اژانس د پاکستان بهرنیو چارو وزارت د یوه چارواکي په وینا چې د نوم له اخیستو ډډه کړې ده، خبر ورکړی دی چې د سارک د څلورو هېوادونو د بایکاټ له امله به د سارک راتلونکې غونډه پاکستان هم وځنډوي.
