په کابل کې د زرغون بهیر ټولنیز بنسټ له حکومت څخه وغوښتل چې د وسله والو طالبانو پر وړاندې دې یوه روښانه پالیسي غوره کړي.
د دې بنسټ د غړو شمېر چې سلګونو ته رسېده د پنجشنبې په ورځ د کابل ښار د عیدګاه جومات مخې ته راټول او د وسله والو طالبانو له خوا یې د کندز ولایت وروستۍ پېښه یو جنایت وباله.
دوی وویل، د کندز په وروستۍ پېښه کې چې یوولس مسافر په کې ووژل شول او اته کسه یرغمل دي، د ځینو امنیتي مسؤلینو د کمزوري مدیریت نتیجه ده.
دغه اعتراض کوونکو زیاته کړه، د دې لپاره راټول شوي چې حکومت ته په ډاګه کړي چې د بې ګناه خلکو پرله پسې وژل کېدل ورته نور د زغملو نه وړ دي.
د زرغون بهیر ټولنیز بنسټیز پریکړه لیک هم ولوست چې په کې راغلي وو:
"له حکومته غواړو چې هغه طالبان چې د جرم پر مهال نیول او اوس بندیان دي باید مجازات کړي. همدارنګه له دولته غواړو د وسله والو طالبانو ډله چې د طالبانو د نوي مشر تر مشرۍ لاندې د کندز د وروستۍ پېښې لامل شوی، ملګرو ملتونو ته د تروریستي ډلې په نامه معرفي کړي."
دا په داسې حال کې ده چې د روانې اوونۍ د سې شنبې په ورځ وسله والو طالبانو د کندز ولایت د علي اباد په سیمه کې نږدې دوه سوه سپرلۍ له موټرو کښته کړي، له دې ډلې یې یوولس تنه وژلي او اته تنه یې یرغمل کړي دي.
د زرغون بهیر د بنسټ غړو دا هم وویل، د کندز پېښه په لوېو لارو کې د کمزورو امنیتي تدابیرو له امله رامنځته شوې ده.
دوی له حکومته دا هم وغوښتل چې د امنیتي مسوولینو فعالیتونه دې په جدي ډول وارزوي.
دغې پېښې د هېواد په زیاترو ولایتونو کې د خلکو اندیښنې راپارولي او غندلې یې ده.
امنیتي ځواکونه وايي، د کندز ولایت د لویې لارې د امنیت او د یرغمل شوېو مساپرو د خلاصون لپاره یې هڅې تېزې کړي دي.
د افغانستان د دفاع د وزارت ویاند دولت وزیري وايي:
"اته تنه له هغوی سره یرغمل دي، د شلمې فرقې قوماندان ډاډ راکوي چې د دې کسانو د خلاصون لپاره یې عملیات پیل کړي خو دا عملیات په احتیاط سره پر مخ ځي. زموږ ځواکونه هلته موجود دي او هڅې کوي چې یرغمل شوي روغ رمټ ازاد شي."
د کندز پېښه لومړنۍ پېښه نه ده بلکې له دې وړاندې هم په ځینو لویو لارو کې وسله والو طالبانو د موټرو سپرلۍ کښته کړي ځیني یې وژلي او ځیني یې یرغمل کړي دي.
خو د افغانستان د امنیتي ادارو مسوولین وايي، د ټولو لوېو لارو د امنیت ټینګښت ته جدي تدابیر په پام کې لري.
راپور: خان محمد سیند
