Күлкү кербени

Түштүктүн айрым оодандарына келсеңиз, сиз менен учурашып, анан өз жолуна түшмөкчү болгон киши "сизге менден кандайдыр-бир жардам же көмөк керек болсо, тартынбай айтыңыз" деп чубалжытып көп сүйлөп башыңызды оорутуп отурбастан, жөн гана: "Кызмат барбы?" деп коюшат ("Мага кызмат барбы?" деп да айтышат).

Муну түшүнбөгөн бир аркалык киши түштүк жактагы бир ооданга жетекчи (аким же башкасы) болуп келип калыптыр.

Ага өзүнүн кол алдында иштей турган киши саал-паал баарлашкан соң, "эми кете берейин" дегенчелик кылып:

"Мага кызмат барбы?" деп кайрылса, берки аны жаман көргөн имиш:

"Өзүнүн соп-сонун жумушу турса, жакшылап тааныша элек жетекчисинен башка кызмат ордун омуроолой сураган кызыктай неме экен," - деп.

Мурдагы мамбашчы Курманбек Бакиев Кыргызстандагы бийлигин, Бишкек көчөлөрүн сагынып, өзгөчө Ак үйдү жанынан көргүсү келип, аялча кийинип алып, Бишкекке келиптир да, Ак үйдүн жанында аркы-терки өткөндөрдү карап турган экен.

Ак үйдүн бет маңдайындагы бурчта чемичке сатып отурган бир кемпир капысынан: "Ай, Курманбек, кел, чемичке ал!" - деп чакырат.

Чочулап, борбордон качып кеткен Кукең эртеси аялдардын саал-паал башкачараак көйнөгүн кийинип алып, Ак үй жакты айланып сейилдеп жүрсө, баягы чемичке саткан кемпир дагы кыйкырат дейт:

"Ай, Курманбек, кел, чемичке албайсыңбы, атейин сага арзан сатсамбы деп отурсам, кечээ дагы эчтеке сатып албай кетип калдың!"

Айласы кеткен Куке кемпирдин жанына барып:

"Мени кантип таанып койдуңуз?" - деп шыбыраса, алиги кемпир бүлкүлдөп күлүп, анан минтип айтыптыр:

"Ээ катыгүн, мени тааныган жоксуңбу? Мен Аскар Акаевич эмесминби!"

(Интернеттеги коомдук тармактардан).