Сот адилеттиги тууралуу дүйнөлүк азилдерден жаңы бир шиңгил.
* * * * * * *
‑ Урматтуу жаран Баланчаев! Эми Сиз сот алдында нагыз чындыктан башка эч сөз айтпайм деп шерт кармаңыз да, анан сүйлөй бериңиз!
‑ Менин укуктарымды ушинтип чектеп койдуңуздар, эми кайсыны сүйлөйм?
* * * * * * *
Батыштын бир өлкөсүндө сот отурумунан кийин айыпталуучу адвокатына ыраазы боло жалыныптыр:
‑ Айланайын, адвокат мырза! Сиз менин айтканымдай чечип бердиңиз! Мени өзүм ойлогондой эң төмөнкү мөөнөткө абакка кесип жатышат!
‑ О, мырза! Сиздин өтүнүчтү аткаруу мен үчүн оңой-олтоң болбоду. Аз жерден соттор сизди биротоло актап сала жаздашпадыбы!
* * * * * * *
‑ Ата, эки дүйнөдө тең бактылуу болгондорду билесизби?
‑ Билем, чырагым.
‑ Ал – ким?
‑ Биздин кошуна. Ал сот болуп иштейт. Мурдагы режимдин каршылаштарын айоосуз соттогон, азыркы режимде да бийликтин каршылаштарын өлө соттоп жатат.
* * * * * * *
‑ Акыркы сөзүм ушул: жыгач балка менен чаба берип ондогон кишилерди өлтүрүп, тагдырын бузуп, канчасын мүлкүнөн ажыраттыңыз, деги өзүңүздү актай турган жүйөө табылаар бекен?
‑ Жөнсүз ыржактабаңыз, айыпталуучу! Сотко обу жок тийише берсеңиз жооп берип каласыз.
* * * * * * *
‑ Неге Фемиданын көзү таңылуу?
‑ Ал байкуш пара алганда көзү менен тиктеше каламбы деп тартынат.
* * * * * * *
Укукчу студент диалектикалык материализмден сынак тапшырып жатат. Окутуучу:
‑ Кана, карама-каршылыктардын биримдиги жана күрөшү жөнүндө бир мисал келтириңизчи?
‑ Эгерде прокурор өзү жемкордон пара алса, ошондой болот.
* * * * * * *
Акыркы сот отурумунан мурунку күнү айыпталып жаткан киши адвокатына кайрылат:
‑ Соттун төрагасына француз конягынан белек кылсам болобу?
‑ Жо-ок, кокуй! Бардыгын бүлдүрөсүз! Сот өтө принциптүү неме.
Эртеси сот отуруму айыпталуучуну толук актоо менен аяктады.
‑ Көрдүңүзбү, коняксыз эле чечип алдык, - деди өзүнө маашырланган адвокат.
‑ Бирок мен сотко коняк бердирип ийгем!
‑ А-а?!.
‑ Мен бир жасалма армян конягын таптым да, доочунун визит кагазын кагаз кутучага кошо тиркеп, соттун дарегине жөнөтүп ийгем.
* * * * * * *
‑ Өзүңүз жакшынакай эле киши көрүнөсүз? Коңшуңуздун чоорун уурдап алганыңыз чын экенин мойнуңузга да алдыңыз. Сиз чоордо ойногонду жакшы көрөсүзбү?
‑ Жок, аны каягынан кармап үйлөштү деле билбейм, урматтуу сот.
‑ Анан эмнеге уурдадыңыз?
‑ Коңшум да ойногонду эч билбейт, бирок керээли кечке кулак кужурун алып үйлөй берет, үйлөй берет.
* * * * * * *
TT.
