"Азаттыктын" Прагадагы кеңсесинин кызматкери, журналист, саясат жана экономика тармактары боюнча адис. Кыргыз улуттук университетинин журналистика факультетин аяктаган.
Мексикада азыр дүйнө өлкөлөрүнө жайыла баштаган илдеттин ыктымал очокторун издөөдө чочко фермаларына көңүл бурулуп жатат. Ал эми саламаттыкты сактоо тармагын тейлеген расмий өкүлдөр илдет чочконун этин жегенден эмес, адамдан - адамга жугарын баса белгилөө менен эл арасында жаңылыш түшүнүк калыптанганына тынчыздануу билдирүүдө.
Казакстандын Алматы шаарында Арал деңизин сактап калуу боюнча эл аралык кордун саммити өттү. Бирок жыйындын жүрүшүндө расмий күн тартиптен тыш билдирүүлөр да жасалып, саммит аймактагы суу көйгөйүн ачык талкуулоо мүмкүнчүлүгү катары да пайдаланылды. Борбор Азия лидерлери пикир келишпестиктерди бул ирээт да жеңе алган жок.
Олимпиада сындуу ири спорттук иш-чараны өткөрүү конок ээси болгон шаар менен өкмөткө ири алды кадыр-барк, ага катар чыгаша да алып келет. Бирок чыгашасыз киреше кирбейт демекчи, АКШда жүргүзүлгөн жаңы иликтөө Олимпиада соода-сатыктын өнүгүүсүнө да олуттуу салым кошорун көргөзгөн.
Түркмөнстанда эл аралык конференция өтүп жатат. Жыйын кечээ башталды. Анын күн тартибиндеги маселелер өлкөнүн өзү менен бирге энергия алган булактары жана жолдорун көбөйтүүгө умтулуп жаткан Евробиримдик үчүн да маанилүү.
Евробиримдиктин энергия боюнча саммити келерки айда Чехияда өтөт. Бирок Борбор Азиянын газын Европага Орусиянын аймагасыз алып келүүнү көздөгөн Набукко долбоору мурда күтүлгөндөй анда башкы эмес, башка долбоорлордун катарында эле талкууланмакчы.Талдоочулар мунун себебин Германия өкмөтүнүн өнөктөштөрдү эмес, өзүн көбүрөөк ойлогон энергия саясатынан көрүшөт.
Президент Обама Иран сотунун АКШнын теги боюнча ирандык журналисти Роксана Саберини 8 жылга түрмөгө кескен өкүмүнө “абдан иренжигенин” билдирди. АКШнын пайдасына тыңчылык кылды деп айыпталган журналистке карата сот өкүмү ушул ишемби күнү чыгарылган эле.
АКШ Америка континентинин бардык өлкөлөрү, анын ичинде Вашингтондун катаал сынчылары менен да “тең укуктуу өнөктөштүккө” умтулат. Президент Барак Обама мындай убаданы Америка өлкөлөрүнүн учурда Тринидад жана Тобаго жумуриятында өтүп жаткан саммити учурунда жасады.
Орусияда өлкөдөгү авторитардык системаны өзгөртүүгө чакырган белгилүү инсандардын саны көбөйүүдө. Ошол эле учурда өлкө экономикасы азыркы кризистин запкысын тартып жатат. Мына ушундай шартта орус президенти Дмитрий Медведев интеллигенциянын либералдуу канатына жүзүн бурду. Бул Кремл чын эле реформаны көздөгөнүнүн жышааныбы?
Тажикстандын Улуттук банкында жүргүзүлгөн акыркы аудит бир миллиард доллардан ашуун акча жетпей турганын аныктады. Мындан улам ири өлчөмдөгү мамлекеттик каражаттын максатсыз жана жеке кызыкчылыкта пайдаланылышын Улуттук банктын мурдагы төрагасы жана өлкөнүн учурдагы вице премьер-министринен көрүп жатышат.
АКШ президенти Барак Обама амеркалыктарды экономиканы жандандыруу боюнча пландын натыйжаларын сабырдуулук менен күтүүүгө чакырууда. Анткени экономикадагы азыркы рецессия тез эле аяктай койбойт. Кечээ Вашингтондогу Жоржтаун университетинде сүйлөгөн сөзүндө Обама өзүнүн экономикалык саясаты натыйжа бере баштаганына токтолуп, өлкө каржылык күч-кубатка кайрадан толоорун божомолдоду.
АКШ жана анын Европадагы өнөктөштөрү Иран менен өзөктүк программасы боюнча сүйлөшүүлөрдү баштоо үчүн Вашингтон узактан бери коюп келе жаткан талаптан баш тартууну караштырууда. Бул тууралуу “Нью-Йорк Таймс” гезити жазып чыкты. Эгер ал чын эле ишке ашса, Иранга карата АКШнын мурдагы администрациясы учурундагы саясаттан чукул ажырым жасалганын көрсөтөт.
Сомалиде деңиз каракчылары америкалык кеменин капитанын барымтада кармашууда. Учурда ал аймакта АКШнын согуштук кемеси жүрөт. Бул - деңиз каракчыларынын Сомалинин жээктеринен жүк тарткан кемелерге жасаган соңку кол салуусу, бирок америкалык жарандын алгачкы ирээт барымтага алынуусу болду.
Кыргызстандагыдай сыяктуу эле Грузияда да саясий партиялардын бир нерсени макулдашуусу абдан татаал иш. Бирок саясий күчтөрдүн баары мунаса тапкан маселе - өлкөнүн НАТО менен Евробиримдикке кошулуу мүдөөсү эле. Бирок былтыркы жылдын августундагы согуштан кийин бул мунасага доо кеткенинин белгилери байкалууда.
Чеченстандын президентинин кызматына Рамзан Кадыров расмий киришкенине быйыл 5-апрелде эки жыл толду. Бирок анын бул кызматты мындан ары да ээлөө мүмкүнчүлүгү тездик менен азайып жаткандай. Маалыматы бар байкоочулардын ишениминде, Орусиянын жетекчилиги акыр аягында Кадыров алар үчүн кыйынчылык менен катар коркунуч да жаратарын түшүндү.
Тажикстанда жөөт жамааты жаңы синагогага ээ болду. Сыйынуучу жайдын жаңы имараты жөөттөрдүн Пасха майрамын утурлай ачылууда. Тажикстандын аймагындагы эң эски жана акыркы синагога былтыр президенттин жаңы резиденциясына жол ачуу үчүн сүздүрүлүп салынганда, бир топ талаш-тартыштарды жараткан эле.
Пакистандын батышындагы Сват өрөөнүндө он жети жаштагы кыздын сабалып жатканы тартылган видеотасманын элге тарап кетиши өлкөдө чоң талаш-тартыштарды жаратты. Өткөн дем алыш күндөрү болгон нааразылык акциялар коомчулукта Талибанга каршы кыжырдануунун деңгээли өсүп жатканын көргөздү.
Эл аралык валюта кору Евробиримдиктин борбору менен чыгышынын экономикалык кризистен сокку жеген өлкөлөрү еврозонанын толук кандуу мүчөсү болбосо да, акчасын алмаштыруусу керек деп эсептейт. Жогорудагыдай сунуш уюмдун жашыруун баяндамасында айтыларын Лондондо чыгуучу “Financial Times” гезити жазып чыкты.
Азербайжандын шайлоо комиссиясынын билдиргенине караганда, ушул шаршембидеги референдумда добуш бергендердин басымдуу бөлүгү Конституцияга киргизилүүчү өзгөртүүлөрдү колдоду.
"Азаттык жана Эркин Европа" радиосунун кабарчысы Хизер Махер (Heather Maher) "Вашингтондон кат" рубрикасында бул ирээт жакырчылыктын Америкадагы жаңы көрүнүштөрү тууралуу төмөнкү баяндамасын жөнөттү.
Экономикасы жана акчасы эң туруктуу деп саналган Швейцария Батыш өлкөлөрү ичинен биринчилерден болуп улуттук акчасынын башка чет элдик валюталарга курсун атайлап төмөндөттү.
Дагы жүктөңүз
