“Азаттыктын” Бишкектеги кабарчысы. 2011-жылы Мамлекеттик Ардак грамота менен сыйланган. Кыргыз улуттук университетинин филология факультетин аяктаган.
Бүгүн Ат-Башы районунун үч айылынын тургундары Бишкек-Торугарт жолун тоскону жатат. Мындай нааразылыкка кыргыз-кытай чегиндеги Торугарт бажысынын ичкери көздөй 50 чакырымга жылдырылышы себеп болууда. Жергиликтүү эл муну менен кошо Кытайдын чек арасы да бери көздөй жылышы ыктымал деп шектенүүдө. Бул маселенин тегерегинде “Ак шумкар” партиясынын Нарындагы координатору Урмат Акунов “Азаттыктын” түз ободогу суроолоруна жооп берди.
АКШ конгрессмени Эни Фалеомаваега эки күндөн бери Кыргызстанда иш сапары менен жүрөт. Ал бир катар тармактардын жетекчилери менен жолугушуп, эки өлкөнүн мамилелерин бекемдөө жана экономикалык кызматташтык боюнча сүйлөштү.
Президенттикке талапкер Алмазбек Атамбаев 30-июнда билдирүү жасап, бийликке кошомат кылган адамдар тарабынан өзүнө маалыматтык чагым таратылып жатканын билдирди. Ошондой эле бүгүн жарандык коомдун өкүлдөрү маалымат жыйынын өткөрүп, шайлоо алдындагы үгүт иштерин жүргүзүүдө талапкерлердин тең укуктуулугу сакталбай, бардык жерде бийлик азыркы президенттин талапкерлиги үчүн иштеп жаткандыгын маалымдашты. Алардын белгилөөсү боюнча оппозициялык маанайдагы талапкерлердин өкүлдөрүнө бийлик тарабынан түрдүү коркутуп-үркүтүүлөр болуп жатат. БШК болсо мындай маалыматтардан кабарсыз экендигин билдирип, алакан жаюуда.
23-июлда боло турган президенттик шайлоого байланыштуу талапкерлер ортосундагы тирешүү күч алууда. Талапкерлердин бири Нурлан Мотуев дагы бир талапкер Жеңишбек Назаралиевди өзү менен телетаймашка чыгуудан баш тартканы үчүн сынга алды. Экинчи бир талапкер Алмазбек Атамбаев үгүт иштеринин жүргүзүлүшүнө ар бир талапкерге бирдей шарт түзүп бере албаган БШКны жана өзүнүн аброюна доо кетирген айрым маалымат каражаттарын сотко бермекчи.
АКШ баштаган антитеррордук күчтөрдүн аскердик “Манас” аба базасынын ордуна Американын аскердик эмес багыттагы жүктөрдү транзиттөөчү логистикалык борборун түзүү тууралуу АКШ-Кыргызстан өкмөттөрүнүн келишими бүгүн Жогорку Кеңеште көпчүлүк депутаттардын колдоосун тапты. Коммунисттер фракциясы бул келишимге карата добуш берүүгө катышкан жок.
“Манас” аба майданында АКШнын транзиттик борборун ачууга байланышкан маселе коомчулукта кызуу талкууга алынып жатат. Айрым саясатчылар кыргыз бийлиги бул келишимди түзүүгө өз демилгеси менен барбаганын айтышса, дагы бирлери жаңы келишим түзүү менен Кыргызстан чоң утушка ээ болоорун белгилешүүдө.
Социал-демократтар фракциясынын мүчөсү, ЖК депутаты Ж. Жээнбеков убактылуу саясаттан кетүү үчүн партиядан чыгарын жана депутаттык мандатын тапшырарын бүгүн эртең менен билдирген эле. Бирок фракция башчысы Б. Бешимов партиялашы бул чечиминен кайтканын билдирди.
Саясатчылардын байкоосунда президенттик жарышта теңчилик сакталбай, бийликке атаандаш талапкерлердин басмырланып жатышы Кыргызстанда жаңы көрүнүш эмес. “Таза коом” партиясынын лидери Табылды Акеровдин баамында, элдин көңүлү оппозицияга ооп турса да, бийлик баары бир административдик күчүн колдонуп, шайлоо эрежелерин одоно бузуп, каалагандай калчап утуп чыгат.
18-июнда мамлекет башчы Курманбек Бакиев шайлоочулар менен жолугушуу үчүн Таласка барган. Бирок милиция президенттин сөзүн угууну каалаган айрым карапайым адамдарды жолугушууга жолотпой, кайра кармап, кууп-айдап басмырлаган. Алардын көпчүлүгү Алмазбек Атамбаевдин сүрөтү тартылган көйнөктөрдү кийип жүрүшкөн. БЭКтин Таластагы штаб жетекчиси Койсун Курманалиева Таласта болгон ушул көрүнүштөр элдин нааразылыгын туудуруп жатканын “Азаттыкка” билдирди.
Кыргыз өкмөтү “Камбар-Ата-2” ГЭСинин курулушун аягына чыгарууга жетиштүү каражат жок экендигин белгилеп, буга байланыштуу акционердик коом түзүлөрүн билдирүүдө. Белгилүү экономист Айылчы Сарыбаев акционердик коом түзүү аркылуу ГЭСтин курулушуна инвесторлордон каражат тартууга мүмкүн экенин белгилейт.
ЕККУнун Бишкек кеңсесинин өкүлү Миклош Харашти Кыргызстандын тышкы иштер министри Кадырбек Сарбаевге кат жолдоп, анда журналисттерге кол салуулар президенттик шайлоо алдында ойлордун эркиндигин чектейт деп билдирди. Ал ошондой эле бийликти мындай чектөөлөрдү жоюу чараларын көрүүгө чакырган. Буга байланыштуу "Азаттык" кол салууга кабылган журналисттердин бири Абдувахаб Мониевди маектешүүгө чакырды.
Шайлоого бир айдан ашыгыраак убакыт калды. 18-июндан баштап талапкерлер үгүт иштерин жүргүзүүгө киришет. БЭК бирдиктүү талапкери Алмазбек Атамбаевдин жер-жерлердеги штабдарына кысым көрсөтүлүп жаткандыгын айтып, коңгуроо кагууда. Шайлоо өнөктүгү маалында бирдиктүү оппозиция туш болгон кыйынчылыктар жөнүндө аталган кыймылдын басма сөз катчысы Жоомарт Сапарбаев билдирет.
Улуттук коопсуздук боюнча мамлекеттик кызматтын өкүлдөрү Ноокат окуясы боюнча соттолгондордун тууган-уруктарынын үйлөрүнө барып, аларды видео-маекте соттолгон жакындарын “Хизб-ут-Тахрир” партиясына тиешеси бар деп президент Курманбек Бакиевден кечирим сураганга жана ырайым кылсын деп айтууга мажбурлап жатышат. Бул жөнүндө “Кылым шамы” бейөкмөт уюмунун жетекчиси Азиза Абдурасулова “Азаттыкка” айтып берди.
Орусиянын Екатеринбург шаарында Шанхай кызматташтык уюмунун саммити өтүүдө. Бул уюмдун иш-аракети, Борбор Азиядагы кырдаал тууралуу “Азаттыктын” түз ободогу суроолоруна “Ата Мекен” партиясынын төрагасы Өмүрбек Текебаев жооп берди.
Алдыдагы президенттик шайлоонун калыс өтөөрүнө эмитен эле күмөн саноолор күч. Эгерде добуштар бурмаланып, шайлоо мыйзам бузуулар менен коштолсо Кыргызстанда да Ирандагыдай эл толкуп чыгабы? Бул маселе боюнча “Азаттыктын” түз ободогу суроолоруна Бириккен элдик кыймылдын мүчөсү, саясатчы Мукар Чолпонбаев жооп берди.
АКШ баштаган антитеррордук күчтөрдүн “Манас” аба базасына байланыштуу кызуу кептердин аягы тыйыла элек. Айрым саясат талдоочулар “Манас” аба базасынын Кыргызстанда калуусуна Орусия өз кызыкчылыгынын негизинде макулдугун берди деп белгилешсе, бүгүн саясат талдоочу Александр Князев база боюнча жаңы келишим даярдалганын айтты.
Акыркы 16 жылдан бери Кыргызстанда демократиялуу, адилет шайлоо болгон жок. Бирок бул жолку президенттик шайлоодо бийлик элди алдай албайт. Социал-демократтар партиясынын мүчөсү, ЖК депутаты Роза Отунбаева "Азаттыктагы" маегинде ушундай пикирин билдирди.
Ооган президенти Хамид Карзай КР президенти Курманбек Бакиевге атайын кат аркылуу кайрылды. Анда Хамид Карзай Пакистан, Ооганстандагы кырдаалдардын курчушуна байланыштуу антитеррордук коалициянын аскердик “Манас” аба базасын Кыргызстанда калтыруу тууралуу өтүнүчүн билдирген.
Шаршембиде Бишкекте “Жарандык коом жана БШК: шайлоолорду уюштуу үчүн диалог” деп аталган жыйын өттү. Анда алдыдагы президенттик шайлоону акыйкат өткөрүүнү камсыздоочу маселелер каралып, тараптар бул боюнча түрдүү пикирлерин билдиришти. Айрым саясий партиялардын жана бейөкмөт уюмдардын өкүлдөрү шайлоо жараяны ушул таптан тартып эле бузула баштаганын айтып чыгышты.
Кыргызстанда жазгы талаа иштери кызуу жүрүп жаткан кез. Эгин-тегиндер түштүктө дээрлик айдалып бүтүп калса, өлкөнүн түндүк аймактарында айдап-себүүлөр эми башталып жаткан жерлер да бар. Ошол эле учурда жаз аяктап жатса да, айрым жерлердеги айдоо аянттары иштетилбеген бойдон калууда.
Дагы жүктөңүз
