Евробиримдик менен Россиянын 15 жыл чукулдап калган жигердүү кызматташуусуна карабай, фундаменталдуу саясый маселелер боюнча ортодо чоң карама-каршылыктар кала берүүдө. Россиянын тышкы иштер министри менен ЕБнын делагациясынын шейшемби күнү Люксембургда өткөн кездешүүсүндө да эки арадагы келипестиктерге көңүл бурулду.
Мексикада жаңы катталган чочко тумоосу Америка, Европа жана Азия өлкөлөрүн камтага салды. Көпчүлүк өлкөлөр жаңы жугуштуу дартты жайылтпоо максатында чек ара көзөмөлүн күчөтүштү. Ошол эле учурда улуттук өкмөттөр элди ашыкча дүрбөлөңгө түшпөөнүн аракетин жасашууда.
Түндүк Корея ишемби күнү Йонбендеги атомдук ишканасында плутонийди өндүрө баштагынан жарыя кылды. Андан бир нече саат мурда БУУнун Коопсуздук кеңеши коммунистик Кореянын маанилүү үч компаниясына каршы санкция киргизген эле.
АКШ президенти Барак Обама I Дүйнөлүк согуш учурундагы Түркиянын аймагында болгон армяндарды кырууну “геноцид” деп атаган жок. Барак Обама 24-апрелде жасаган билдирүүсүндө эзелки көзкарашын өзгөртпөгөнүн белгилеп, алааматты “XX кылымдагы эң ырайымсыз кыргын” деп сыпаттады.
Ар бир элдин тили, тарыхы жана маданияты улуттун айрылгыс бир компоненти саналат. Башкыртстандын борбору Уфада өткөн митингдин катышуучулары Москвадан мектептерде “улуттук компонентке” тиешеси бар сабактарды окутуу РФнын курамына кирген ар бир жумурияттын ыктыярында болсун деп талап кылышты.
Май айында АКШ өкмөтү Ирак жана Ооганстандагы америкалык аскерлердин камактагы туткундарга көрсөткөн кыйноосун ашкерлеген ондогон сүрөттөрдү жарыялайт. Бул жөнүндө Адам укугун коргоочу беделдүү уюм-“Жарандык эркиндиктин америкалык союзу”(ACLU) бейшемби күнү маалымдады.
АКШ Мамкатчысы Хиллари Клинтон Өкүлдөр жыйынын Тышкы иштер комитетиндеги угууда эгер Тегерандын өзөктүк программасы боюнча сүйлөшүүлөр ийгиликсиз болсо, Иранга каршы чектөө (санкция) дагы күчөтүлүшү керек деп айтты.
Ак үйдө бийлик алмашкан үч айдан бери АКШ президентинин Жакынкы Чыгыш боюнча атайын чабарманы Жорж Митчелл региондо үч ирет болду. Ал үч визитти тең Израил жана Палестин тараптын “эки мамлекет түзүү аркылуу маселени чечүү” боюнча сунуштарын угууга арнады. Митчелл эки жактын ой-сунуштарын качан угуп бүтөт?
Түркия-Армения чек араны ачуу маселесинде эки тарап бир топ алдыга жылышты. Бирок бул маселе Түштүк Кавказды коогага салган башка проблемалар, анын ичинде Тоолуу Карабах чатагы менен чогуу жөндөлүшү шарт. Мындай билдирүүнү Түркиянын тышкы иштер министри Ала Бабажан шейшемби күнү Прагада жасады.
Кошмо Штаттардын экономикасы оңоло баштаганын күбөлөгөн алгачкы белгилер байкалганын мартта АКШ Борбордук банкынын төрагасы Бен Бернанке жар салган. 14-апрелде президент Обама да экономикада оң жышаана байкалып калганын билдирди. Россия менен Британияда да кризистин оор учуру артта калганы айтылууда.
21-апрелде ЮНЕСКО Дүйнөлүк электрондук китепкананы (World Digital Library) ачты (www.WDL.org). Маданий түшүнүү аркылуу тынчтыкты бекемдөөгө кызмат кылчу долбоор окурмандарды дүйнөдөгү 32 чоң китепканада, анын ичинде АКШ Конгрессинин китепканасында сакталган көөнөргүс керемет маданий мурастар менен сегиз тилде тааныштырат.
Улуттар Уюмунун расизм боюнча Женевада ачылган конференциясына бир катар Батыш өлкөлөрү келбей койду. Себебин алар Иран президенти Махмуд Ахмединежад жыйынды Израилди жөнсүз жемелөө үчүн пайдаланат деген кооптонуулары менен түшүндүрүштү.
Вашингтон күнкорсуз Палестин мамлекети түзүлгөнүн каалайт. Бул жөнүндө АКШнын атайын чабарманы Жорж Митчелл Иерусалимде жүрүп билдирди.
Пакистан президенти Асиф Али Зардари Сват өрөөнүндө жана коңшулаш Малаканд регионунда шариятты колдонуу жөнүндөгү жарлыкка 13-апрелде кол койду. Бул чара талиптерге бийлигин каалагандай жүргүзүүсүнө өбөлгө түзөт деген кооптонууларды жаратты.
Шейшемби күнү Тегеранда америкалык журналист Роксана Саберинин соту башталды. Сабери айым январдан бери абакта болчу. Теги ирандык журналистке АКШнын пайдасына шпиондук кылды деп күнөө коюлууда.
Тбилисиде Михаил Саакашвилинин президенттиктен кетүүсүн талап кылган митинг уланууда. Оппозиция лидерлери талаптары аткарылмайынча, акцияны токтотпосун айтышууда.
Молдованын Конституциялык соту президент Ворониндин суранычына жараша 5-апрелдеги парламенттик шайлоонун жыйынтыгы толук бойдон кайра эсептелсин деп чечти. Жекшемби күнү да Кишиневде саясый эркиндикти жана 7-апрелдеги тополоңдуу митингде кармалган адамдарды бошотууну талап кылган демонстрация өттү.
Грузин оппозициясы Михаил Саакашилини президенттиктен кетирүү максатында жума күнү “атуулдук баш ийбөө өнөктүгүн” баштады. Саакашвили көчө жүрүшчүлөрү талап кылса эле бийликтен кетпесин айтып, оппозиция лидерлерин ынтымакка жана өз ара сүйлөшүүгө чакырды.
Президент Барак Обама Европадагы биринчи визити учурунда чет элдик лидерлердин көңүлүнө толуп, аны укканы чогулган миң сандаган элдин сүймөнчүгүнө айланды. Бирок көпчүлүк байкоочулардын пикиринче, Обама али эл аралык майданда конкреттүү ийгиликке жетишпеди.
Кечээ Михаил Саакашвилинин президенттиктен кетүүсүн жана кезексиз шайлоо өткөрүүнү талап кылып, Грузия парламентинин алдына 50 миңден ашуун эл чогулду. Оппозициячыл партиялардын лидерлеринин сөзүнчө, Саакашвили бийликтен кетмейинче демонстрация токтотулбайт.
Дагы жүктөңүз
