Ирак өкмөтү менен Күрт автономиясынын чатагы өлкө түндүгүндөгү мунай кендерине инвестиция салган четэлдик ишкерлердин тынчын алууда. Күрт аймактарынан тышка сатылган мунайдын кирешеси кандай бөлүштүрүлөт? Борбордук өкмөттүн шартына Күрт жетекчилиги көнөбү?
АКШ вице-президенти Жо Байден шаршембиде Сербияга келди. Белградда Байден серб жетекчилиги менен сүйлөшчү талуу маселелердин бири - Косово темасы болот деп күтүлүүдө. Былтыр Косово өз эгемендигин жарыялаганда, АКШнын саясий жараянды колдоосу сербдерди катуу нааразы кылган.
19-майда Москвада ядролук куралдарды кыскартуу боюнча россиялык-америкалык сүйлөшүүлөр башталды. Эски 1991-жылы түзүлгөн Стратегиялык куралдарды кыскартуу жөнүндөгү келишимдин мөөнөтү 5-декабрда аяктайт. Жаңы келишимди иштеп чыгууга багытталган үч күндүк сүйлөшүү, дипломаттардын сөзүнчө, ядролук куралды кыскартуу боюнча тараптардын позицияларын жакындатууга тийиш.
Чейрек кылым ашуун Шри Ланканы тополоңго салган “Тамил жолборстору” козголоңчулары толук талкаланды. Бул жөнүндө Шри Ланканын президенти шейшемби күнү жарыялады. Өкмөттүк күчтөр менен “Тамил жолборстору” ортосундагы 26-жылдык согушта эсептөөлөр боюнча 70 миңден ашуун адамдын каны төгүлгөн.
Иранда 12-июнда кезектеги президенттик шайлоо болот. Каттоодон өткөн 475 талапкердин ичинде белгилүү саясатчыларга катар шопур, тиш доктур, жумушсуз аял жана 19 жаштагы жигит да бар. Талапкерлердин кимиси шайлоого катышарын Ирандын көзөмөлдөө кеңеши 20 жана 22-майда аныктайт.
Жакынкы Чыгышта тынчтыкка жетишүү маселесин президент Барак Обама менен Израил премьер-министри Бинямин Нетаняху бүгүн Вашингтондо талкуулашат. Обама мурдакы президент Жорж Буш сыяктуу Израилге удаа Палестин мамлекетин түзүүнү колдоодо. АКШнын мындай сунушун Нетянаху ачык колдой элек. Ирандын ядролук программасы боюнча да АКШ-Израил арасында бир пикир жок.
БУУнун атомдук энергия боюнча агенттиги-МАГАТЭнин башчысы жакынкы мезгилде ядролук курал жасай алчу өлкөлөрдүн эсеби 10дон 20га чейин жетиши мүмкүн экенин эскертти. Ага жол бербөө үчүн, эл-Барадейинин сөзүнчө, ядролук бомбалуу державалар тез куралсызданып, ядролук сыноолорду өткөрүүгө жана атомдук бомбага керектүү материалдарды өндүрүүгө тыйуу салынуу керек.
Хамид Карзай Ооганстанды региондун “кургактагы көпүрөсүнө” айлантуу боюнча 2001-жылдан бери “бөпөлөп жүргөн” тилегин кайрадан мекендештеринин эсине салды.
Дмитрий Чекалкин Украинадагы белгилүү саясый сатирик. Чекалиндин күлкү жана куйкум аралашкан сүрөттөрү 2004-жылкы Украиндагы “Саргылтым ынкылап” алдында аны эл ичинде өзгөчө таанымал кылды. Сүрөткердин сатирикалык ырларды аткарып, өз ара тамашалашкан “Куунак алчалары” өлкөдөгү өтө белгилүү Интернет сайт.
Рим католик чиркөөсүнүн башчысы Папа Бенедикт XVI күнкорсуз Палестин мамлекети түзүлүшүн жактады. Мындай билдирүүнү Папа шаршемби күнү Батыш Иордандын Вифлеем шаарында жасады. Израилдин маалымат каражаттары Бенедикт XVIны Ыйык Жерге жасаган сапарын пайдаланып, иудейлер менен жакшы жакшы мамиле кура албады деп сындашты.
Рим католик чиркөөсүнүн башчысы Бенедикт XVIнын сөзүнчө, дүйнө элдерин бөлүп жаруу динге сыйбаган иш, бул идеологиялык кутумчулук. Рим Папасы мындай билдирүүнү Иорданиянын борбору Аммандагы эң чоң мечитке барган учурда жасады.
Евробиримдик Азербайжан, Грузия, Түркия жана Египет менен чогуу Россияны жандап өткөн газ жолун өнүктүрөлү деп макулдашты. Бирок Түштүк коридору - Жаңы жибек жолу саммитинин финалдык декларациясына Казакстан, Түркмөнстан жана Өзбекстан кол коюшпады. Жаңы долбоор ЕБ үчүн чоң стратгиялык мааниге ээ. Анткени, Биримдик азыр керектеген газынын төрттөн бирин Россиядан алат.
Кошмо Штаттардын 19 чоң банкынын ону кошумча капиталга муктаж экенин бейшемби күнү жарыяланган “стресс-тест” көрсөттү. Алардын ичинен “Бэнк оф Америка” 33,9 миллиард долларга муктаж. Ак Үйдүн демилгеси менен өткөрүлгөн иликтөө банктар кээ бир финансы эксперттери болжогондон бир кыйла кубаттуу экенин да айкын кылды.
Евробиримдик бейшемби күнү Прагада “Чыгыш кызматташтыгы” программасын жарыялады. Долбоор ЕБ менен экс-советтик Азербайжан, Армения, Белорус, Грузия, Молдова жана Украина ортосундагы саясый-экономикалык мамилени жакшыртууга багытталат.
“Ал-Жазиира” телеканалы Кабылдын Баграм аэродромунда таңгакталган дари жана пуштун тилиндеги “Тоорут” китептери менен турган АКШлык жоокерлерди көрсөттү. Телеканал кээ бир америкалык аскерлер “Тоорутту” өз эркинче оогандар арасында жайылткысы келген болушу этимал деп жоромол кылды. Мындай бүтүмгө АКШ командачылыгы макул эмес. Ооган президентинин кеңсеси “ал-Жазииранын” кабарын “адепсиз жана негизсиз калп” деп сыпаттады.
Дүйшөмбү күнү Тажикстандын борборунда жөөттөрдүн жаңы ибадатканасы-синагога ачылды. Синагога дүйшөмбүлүк жөөттөргө маданий борбор жана жамаат жолукчу жай ирети да болот. Ибадаткананы жамаатка президент Эмомали Рахмондун кайниси, Тажикстандын “Ориенбанкынын” башчысы Хасан Ассадуллозода тартуу кылды.
29-апрелде Казанда улуу жазуучу Чынгыз Айтматовду эскерүү кечеси болду. Татарстандын премьер-министринин орун басары, республиканын маданият министри Зиля Валееванын сөзүнчө, “Чыңгыз Айтматовдо улуттук жана жалпы адамзаттык баалуулуктарды жуурулуштарган укмуштай жөндөмү бар эле.”
Пакистан армиясы өлкөнүн Түндүк батыш чек ара аймагында талиптерге катуу сокку урулганын маалымдады. Дүйшөмбү күнү талиптер Сват өрөөнүндө Пакистандын коопсуздук күчтөрүнө кайра чабуул жасады. Уруш Пакистан өкмөтү аймакта апелляциялык ислам сотун түзүүсүнө талиптер каршы чыккандан соң күч алды.
Экономикалык кризис улана берсе, Пакистан, Россия жана Украинада саясый төңкөрүш болору калетсиз. Саясый кымгууттарды изилдөөчү Eurasia Group консалтинг фирмасы 29-апрелде жарыялаган докладда финансылык капсалаң токтобосо, саясый жетекчиликке жана бийлик органдарына кысым күчөп, дүйнөнүн ар тарабындагы өлкөлөрдө абал осолдогону турат деп да айтылат.
Коопсуздук - Ооганстан үчүн эң чоң маселе. Шаршемби күнү АКШ күчтөрү өлкө түштүгүндө 42 талип согушчанын жок кылганын маалымдады. Пакистан аскерлери болсо Исламабаддан 100 чакырымдай жердеги салгылашууда 50 талип желдетин катардан чыгарды. Бул жагдайда президент Обаманын Ооганстан боюнча жаңы стратегиясы канчалык реалдуу?
Дагы жүктөңүз
