Мамлекетик миграция кызматынын маалыматы боюнча чет өлкөгө чыгып жаткан улан-кыздардын арасында АКШ, Германия, Корея жана Түркия өлкөлөрүнө аттангандардын саны арбын. Аталган мамлекеттерге кеткендердин 60 пайыздан ашуунун 28 жашка чейинкилер түзөт.
Жаңы жерлерди көрүп, дүйнө кыдырууну көксөгөн жаштар үчүн жумуш менен саякатты айкалыштыруу мүмкүнчүлүгү пайда болду.
Эркинбек Жапарбеков круиз лайнеринде тейлөө кызматында иштеп жүрүп Жер Ортолук деңизин, Европанын бир катар өлкөлөрүн кыдырууга жетишкен. Эркинбекке окшоп деңизге чыгууну каалаган ондогон жаштар бул тармакта иш алып барган фирмалардын эшигин каккылап турган мезгили.
“БиТревел” компаниясы көп жылдан студенттерди жайкы каникул маалында АКШга жөнөтүп келет. Компаниянын жетекчисинин орун басары Чыңгыз Баатырбековдун айтымында, океандын ары жагынан жумуш издегендердин саны жыл сайын көбөйүп келет.
Ошол эле мезгилде каалоочуларды тандап алуу жараяны барган сайын татаалдашууда. Буга жаштардын басымдуу бөлүгү иш мөөнөтү соңуна чыкканына карабастан, мыйзамды бузуп болсо да калып кетүүнү көздөгөнү себеп болууда. Анын кедергиси чет өлкөгө камынып жаткандарга эле тиет. Алар үчүн иштөөгө уруксат алуу машакатка айланып, виза алууда маселелер жаралат.
Жаштар чет жерлерге умтулуп жаткан маалда, тескерисинче, башка өлкөлөрдөн Кыргызстанга келип жаткан чет элдик жарандар да аз эмес. АКШнын Вашингтон шаарынан келген Бобби Стерлинг учурда чолпонаталыктарга бизнес жүргүзүүнүн сырларын үйрөтүү менен алек. Жубайы болсо кары-жашы дебей, англис тилин окутуп келет.
