"Азаттык" мындан ары аймактардагы кабарчылар жиберген сүрөт жана видеолор топтомун жарыялап турмакчы.

Баткен

Баткен облусунда 1790 стационардык орун даярдалды.

Өзбекстандын Фергана облусунан жалпы баасы 6 млн. 300 миң сомду түзгөн медициналык каражаттар келди. Анын ичинде коргонуучу каражаттар, ооруну аныктай турган лабораториялык шаймандар бар.​

Ош

9-июлда Ош облусунун бир катар аймактарында коронавирус илдетинин алдын-алуу максатында өрт өчүрүү кызматы менен биргеликте дезинфекциялоо иштери жүрдү.

Гүлчө айылындагы борбордук базарда жайгашкан дүкөн, ашкана, банктар дезинфекция болду.

Талас

Талас облусу эки жумага жабылды. Облустун жетекчиси Марат Мураталиевдин айтымында, эки апта бою «Талды-Булак» бекетинен Таласта каттоосу барлар гана өтө алат, каттоосу жоктор киргизилбейт.

Ал арада Таластагы ооруканаларга коронавирус менен күрөшүү үчүн каражаттар жетишсиз экени белгилүү болду.

Мындан улам Бишкектен жаштардын тобу Таласка дем алдыруучу жети аппарат, жүздөгөн коргонуучу каражат жана беткап жиберишти.

Ысык-Көл

Ысык-Көлдө облустун ичинде жана тышка каттаган маршруттук кичи автобустардын иштешине он күнгө чектөө киргизилүүдө. Каракол шаардык автобекети он күн иштебейт, турфирмалар менен келишими бар кичи автобустар гана каттай алат. Таксилердин ичи 70% гана толууга тийиш.

Мындан тышкары, жума намазга чогулууга да убактылуу тыюу салынды.

Ал арада Ысык-Көл облусунун Тоң районунун Кара-Коо айылынын тургундары айылдагы ооруканага дем алдыруучу аппараттарды сатып алуу үчүн марафон өткөрүп, акча чогултуп жатышат. Таалайбек Досойбек уулунун видеосу.

Коронавирус күчөп, эл кыйналып жаткан маалда аталган райондо кыян жүрүп, Балыкчы - Бөкөнбаев - Каракол автожолунун бир тилкесин жууп кетти.

Жалал-Абад

Жалал-Абаддын Ноокен районунун Достук айыл аймагынын жаштары аймактык ооруканага тогуз даана кычкылтек концентраторун сатып беришти. Айылдын жаштары демилге көтөрүп, өз ара каражат чогултуу менен ар бири 630 АКШ долларына бааланган кычкылтек концентраторун алып беришти. Түркиядан буйрутманын негизинде үч жабдык келсе, калгандары жакынкы күндөрү жеткирилет.

Өкмөттүн облустагы өкүлчүлүгүнүн аппараты аймакка 300 даана кычкылтек концентратору керек экенин билдирди. Учурда дарыгерлер колдонуп жаткан 372 концентраторлордун 23ү иштебей турат.

Нарын

Коронавируска байланыштуу кырдаалдын күч алышынан улам Нарын облусу боюнча 829 орундуу күндүзгү стационар түзүлдү. Алардын ичинде Ат-Башы районунда – 169, Ак-Талаа районунда – 123, Жумгал районунда – 162, Кочкор районунда – 158, Нарын районунда – 120, Нарын шаарында – 97 орун.

Мындан тышкары Нарын шаарында дагы 50 орун даярдалып жатат. Бул туурасында өкмөттүн Нарын облусундагы өкүлү Эмилбек Алымкулов 8-июлда брифингде билдирди.

Өкүл ошондой эле облус аймагында бир катар чектөөлөр киргизилгенин маалымдады.

Бишкектеги жана Кыргызстандагы стационардык борборлор менен фотобаяндан тааныша аласыз.

Ушу тапта Кыргызстанда кыйын кырдаалда ири ишкерлерден баштап, пенсиядагы карыялар, чет жердеги мекендештер кала берсе мектеп окуучуларына чейин жардамга кол сунуп жатышат.

Ал эми Бишкек шаарынын 10 жаштагы тургуну Айрат Касымов атасынын досу белекке берген отуздай жөжөнү бир айдан ашык убакыттан бери багып жаткан.