Демилгечи, тамада Акылбек Осмонов бул идея мурда эле жаралганын, бирок пандемия анын чукул убакта ишке ашырууга түрткү бергенин белгилейт:
«Угуусу чектелген адамдар музыканы башкача кабыл алат да. Субтитрден окуган башка, ал эми аны айтып, көрсөтүп берген таптакыр башка. Эмоциялар таптакыр башкача. Ырдагы сүйүнүч, кайгы кайрыктары өзгөчө башка эмоция бериши мүмкүн».
Акылбек Осмонов ырларды которуп, даярдоого Дүлөйлөр жана азиздер коому, Коомдук телерадио корпорацияда иштеген сурдокотормо тобундагылар жардам бергенин айтты.
Алгачкы видеолорду чыгарууга сурдокотормочу Айзада Абдылдаева көмөктөшкөн.
«Биз Айзада менен иштешүүнү чечип, эң алгачкы ырды которгондо албетте толкундандык. Азыр кыйла үйрөнүп калды. Долбоор үчүн алгачкы ырды тандоо да кыйын болду. Жыйырмадай ырдын арасынан “Ильяздын ыры” деген чыгарманы тандайлы деп турганбыз, - дейт Акылбек Осмонов. - Сыртта жаан себелеп калган экен. Анан дароо эле “Жамгыр төктү” деген ыр эске түштү. Аны Айзадага жибердик. Ал да макул болуп, биринчи видео даяр болду. Аны Интернетке жарыялаган күнү эле угуусу начар адамдардан каттар келе баштады. Толтура ырларды сурана башташты. Ырчылар өздөрү байланышка чыгышты».
Долбоордун жетекчиси Акылбек Осмонов негизги максат угуусу начар жана саламаттыгы өзгөчө жаштарга блогерликти үйрөтүү экенин белгилейт:
«Долбоордун эң негизги максаты - угуусу начар жаштардын арасынан блогер болгусу келген каалоочулар болсо, албетте аларга кантип баракчаны алып баруу керектигин, блогерликтин сырларын, кантип соцтармактардан акча табууну үйрөтүү болгон. Алдыда биз бул багытта иштей беребиз».
Эми угуусу начар адамдар үчүн чыгармачыл топ дагы 20дан ашуун популярдуу кыргыз ырларын даярдап жарыяламакчы.
Каржылык жактан долбоорго “Сорос-Кыргызстан” фонду көмөк көрсөтүүдө.
“Беш бармак” долбоорунун кийинки кадамы белгилүү ырчы, медиа алып баруучулар менен саламаттыгы өзгөчө жаштардын башын бириктирип маанайшат видео контент жаратуу.
Жаңсоо тили менен поп-ырларды аткаруу батышта кеңири тараган көрүнүш. Бул багытта иштеген блогерлер айрыкча элге жаккан ырларды аткарып, жарыялап турушат.
Эскертүү!
«Азаттыктын» материалдарына пикир калтырууда төмөнкү эрежелерди так сактоону өтүнөбүз: кайсы бир саясий партияга, топко үгүттөгөн, же каралаган, бир нече жолу кайталап жиберилген, адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлер жарыяланбайт. Эрежени сактабай жазылган пикирлер сайтка чыкпайт. Модератор пикирлерди жарыялоо же андан баш тартуу укугун өзүнө калтырат.
