Ушул тапта Коопсуздук кеңеши жыйынга чогулганын айрым маалымат каражаттары Жогорку Кеңештин вице-спикери Аида Касымалиевага шилтеме кылып жазышты.
Айрым маалыматтарга караганда, Коопсуздук кеңештин жыйынына президент Садыр Жапаров, парламенттин төрөгасы Талант Мамытов, башкы прокурор Курманкул Зулушев жана ички иштер министри Улан Ниязбеков баштаган бийлик өкүлдөрү катышууда.
Жогорку Кеңеш дагы чукул жыйынга чогулуп, кыргыз-тажик чек арасындагы соңку окуяны жабык карап жатат.
Айрым бир маалыматтарга караганда, анда президент Садыр Жапаровду парламентке чакыруу сунушталды, ошондой эле өкмөт башчы Улукбек Мариповду кызматтан алуу демилгеси көтөрүлдү.
"Азаттыктын" Баткендеги кабарчысынын айтымында, кыргыз-тажик чек арасында ок атышуу токтой элек. Турак жайлар өрттөнүп жатканы кабарланууда.
Буга чейин төрт кыргызстандык жараат алып, ооруканага түшкөн. Тажикстандын чек ара мекемеси жети жаранына таш тийгенин билдирген.
Улуттук коопсуздук боюнча мамлекеттик комитеттин (УКМК) маалыматына ылайык, Баткенде, кыргыз-тажик чек ара тилкесинде чыр жыккан жерде кырдаалды Чек ара кызматынын директору Уларбек Шаршеев көзөмөлдөп жатат.
Кыргызстандын Чек ара кызматы саат 16:30да Баткендеги соңку кырдаал боюнча маалымат таратып, абал курчуганын билдирди.
Мекеменин маалыматына караганда, “тажик тарап атайылап чатак чыгарып, кырдаалды курчутууну улантып жатат”.
Кыргыз тарап “Жараат жана ар кандай травма алган жай тургундар үчүн бардык жоопкерчилик чек арадагы абалды турукташтыруу чараларын иштеп чыгуудан качып жаткан Тажикстандын Чек ара аскерлеринде” деп белгилеп, тажик тарапты чырды тынчтык жолу менен жана эл аралык укук нормаларынын, эки тараптуу макулдашуулардын негизинде чечүүгө чакырды.
Ошону менен катар Кыргызстан «Головной» суу бөлүштүрүү жайы Кыргызстандын аймагында жайгашканын жана Кыргызстандын стратегиялык объектиси экенин белгиледи.
28-апрелде Кыргызстандын Тажикстан менен чектеш аймагында, Баткендин Ак-Сай айылындагы Ак-Суу дарыясында жайгашкан башкы (“Головной”) суу бөлүштүрүүчү жайдын тилкесинде кагылыш болуп, кыргыз тараптан төрт, тажик тараптан жети адам жараат алганын эки өлкөнүн Чек ара кызматтары билдирген.
29-апрелде да жаңжал уланып, Кыргызстандын Чек ара кызматы “Тажикстандын чек ара аскерлери жана Ички иштер министрлигинин атайын багыттагы аскерлери «Головной» суу тосмо жайында миномет, пулемет жана автомат менен жапырт аткылоо башташты” деп билдирди.
Президент Садыр Жапаров өкмөт мүчөлөрү менен кыргыз-тажик чек арасындагы абалга байланыштуу чукул жыйын өткөрдү. Бул тууралуу президенттин маалымат катчысы Галина Байтерек билдирди.
Маалыматка ылайык, өкмөттө атайын жумушчу топ түзүлдү жана аны вице-премьер министр Артем Новиков жетектейт, кырдаалды жөнгө салуу тапшырмасын аткарат. Мындан тышкары Тышкы иштер министрлиги окуяны тынчтык жолу менен чечүү үчүн дипломатиялык иштерди жүргүзүүдө.