Кыргызстан менен Тажикстандын чек арасындагы кошумча күчтөрдү артка алып кетүү жараяны аяктады. Бул тууралуу Улуттук коопсуздук боюнча мамлекеттик комитетинин басма сөз кызматы кабарлады. Маалыматка ылайык, Чек ара кызматы кадимки режимде иштеп жатат.
Мекеменин 29-январдын саат 10:30га карата берген маалыматына ылайык чек ара аймагында кырдаал туруктуу.
Кызыл жарым ай коому Баткендеги чек ара чырынан жабыркагандарга жардам берүү үчүн Ош, Жалал-Абад шаарларынан кошумча күчтөр тартылып, азык-түлүк, жууркан-төшөк, жеке гигиеналык жана башка керектүү каражаттар жеткирилгенин маалымдоодо.
Мындан тышкары аймакка 600 литр күйүүчү май да жиберилди.
Баткенде чек арадагы кырдаалдан улам 11 миңден ашуун тургун эвакуацияланган. Өзгөчө кырдаалдар министрлиги алардын 10 миң 410у коопсуз аймактагы үйлөргө көчүрүлсө, 642 адам убактылуу түзүлгөн пункттарга жайгаштырылганын билдирген.
Кыргызстан менен Тажикстандын расмий өкүлдөрү 28-январдагы жолугушууда чек арадагы чырдын себептерин биргеликте иликтөөнү макулдашты.
Кыргызстандын Министрлер кабинетинин орун басары, Улуттук коопсуздук комитетинин (УКМК) башчысы Камчыбек Ташиев Тажикстандан Чек ара аскерлеринин кол башчысы Ражабали Рахмонали менен Баткен районундагы Достук айылында жолугушту. Эки тараптын делегациясы чек арага тартылган кошумча күчтөрдү, каражаттарды кайра артка алып кетүү жана чырдын себептерин биргелешип иликтөө жөнүндө макулдашты.
"Комиссия түзүүнү чечтик, ал кечээки окуяларды иликтейт. Өзгөчө кырдаалдар министрлигине кечээки окуядан улам үйлөрүнөн качкан жарандарды кайра алып келүү тууралуу тапшырма берилди. Алар бүгүн кече чейин өз үйлөрүндө болуп калышы керек. Чек арага жакын алынып келген күч түзүмдөрүн кайра өздөрүнүн бөлүктөрүнө кайтаруу тууралуу чечим кабыл алынды. Чек арада бир гана Чек ара кызматынын жана коомдук тартипти сактоо үчүн милициянын жергиликтүү бөлүмдөрүнүн кызматкерлери гана калат", - деди Ташиев.
Баткен: куралдуу жаңжалдан кийинки кырдаал
