"Москва облусундагы азербайжандардын аймактык улуттук-маданий автономиясы" коомдук уюмунун жетекчиси Эльшан Ибрагимов Орусиядан Азербайжанга депортацияланды. Ал 4-июлда орус жарандыгынан ажыратылган. РБК басылмасы ал Баку шаарына жөнөтүлгөнүн кабарлады. "Известия" Ибрагимовдун аэропорттогу видеосун жарыялады. Ал: "Депортация тууралуу чечим күтүүсүз болдубу?" деген суроого: "Аз-маз капа болдум", - деп кайтарган.
Ибрагимов 30 жылдай Орусияда жашаган. 2018-жылдан бери азери диаспорасын жетектеп келген. 2018-жылдагы шайлоодо Москва облусунун азыркы губернатору Андрей Воробьёвдун ишенимдүү өкүлү, Улуттук-маданий биримдиктер боюнча консультативдик кеңештин мүчөсү болгон. Ибрагимов жарандыктан ажыратылганы тууралуу маалымат тарагандан кийин Москва облусунун Коомдук палатасы анын аты-жөнүн кеңештин курамынан өчүрүп салган.
РБК басылмасы аны жарандыктан чыгаруу тууралуу чечим 18-июнда "Орусия Федерациясынын улуттук коопсуздугуна коркунуч түзгөн аракеттерди жасаган" деген негизде алынганын өз булактарына таянып жазган. Ибрагимов жергиликтүү басылмага жарандыгы алынганын бышыктап, бирок себебин бир нече күндөн кийин Азербайжанга кайтып барган соң айтып берерин билдирген.
Азербайжан менен Орусиянын алакасы 27-июнда Екатеринбургда 50дөй азери тектүү адам кармалгандан кийин курчуган. Анда эки адам каза тапкан. Экөө оор жараат алган.
Бул окуяга жооп катары Баку өлкөдөгү орусиялыктарды кармай баштады. 1-июлда "Sputnik Азербайжан" агенттигинин кеңсесинде тинтүү жүргүзүлүп, жети адам кармалган. Ошондой эле Орусиядан келген сегиз IT-адиси "уюшкан кылмыштуу топ түзүп, киберкылмыш жана Ирандан маңзат аткезчилиги менен алектенген" деп айыпталууда. Сотко алар бети-башы көгала болуп жеткирилген.
Эки өлкөнүн дипломатиялык тиреши уланып, Москва менен Баку бири-бирине нааразылык нотасын тапшырган.
Шерине