Бишкектеги “2ГИС” компаниясынын кеңсесинин эшигине мөөр басылып, жабылды. Мөөр басылган кагазда кеңсени Улуттук коопсуздук мамлекеттик комитетинин (УКМК) Тергөө башкармалыгынын кызматкерлери 10-июнда жапканы жазылган.
Бул тууралуу атайын кызмат өзү расмий маалымат бере элек.
“2ГИС” компаниясы кеңсесинин жабылганы боюнча комментарий бере элек жана чалууларга жооп бербей жатат.
"2ГИС" - 1999-жылы Орусияда негизделген картографиялык кызмат көрсөткөн портал. Ал Кыргызстанда 2015-жылдан бери иштеп жатат.
Ачык булактардагы маалыматка караганда, 2020-жылдан бери Орусиядагы компаниянын 75% акциясы “Сбербанк” банкына таандык.
Орусиянын Украинага каршы ачкан согушунан улам АКШ, Евробиримдик жана Улуу Британия орусиялык коммерциялык банктардын катарында “Сбербанкка” да санкция салган.
Былтыр 20-августта Кыргызстандын Улуттук банкы жергиликтүү коммерциялык банктарга Батыш мамлекеттеринин “кара тизмесине” кирген каржы мекемелери менен кызматташууну токтотууну эскерткен. Мындан кийин бир нече банк орусиялык “Сбербанк” менен операцияларын токтотконун расмий жарыялаган.
Шерине