Индиянын Ахмедабад шаарынын жанында болгон авиакырсыктан эч ким аман калган жок деп болжолдонууда.
Indian Express басылмасы жергиликтүү полицияга шилтеме кылып борттогу 242 кишинин бардыгы каза тапканын жазды.
Ал эми ANI News агенттиги аман калган бир жүргүнчү табылганын, дагы бири ооруканада экенин полицияга таянып кабарлады.
Air India авиакомпаниясынын Лондонго бет алган Boeing 787-8 Dreamliner учагы асманга көтөрүлгөндөн көп өтпөй кулаган.
AFP агенттиги калаа полициясынын башчысына таянып жазганына караганда, учак кеңселер, турак үйлөр орун алган жерге кулагандыктан каза тапкандардын саны мындан көп болушу мүмкүн.
Индиянын Медициналык ассоциациясы лайнер жергиликтүү дарыгерлер жана медик-студенттер турган жатаканага ураганын, 50-60 киши ооруканаларга жеткирилгенин билдирди. Бир нече киши дайынсыз болууда.
Буга чейин Рейтер куткаруучулар имараттардын биринен 30 кишинин сөөгүн алып чыкканын билдиришкенин маалымдаган.
Кырсыктын себеби азырынча белгисиз. Эксперттер аэропорттун айланасындагы аба ырайы жакшы болчу деп айтууда.
Air India окуянын чоо-жайы иликтенип жатканын Х социалдык тармагына жазды.
Авиакомпания билдиргендей, борттогу 242 кишинин 169у Индиянын, 53ү Британиянын, жетөө Португалиянын жана бирөө Канаданын жараны.
Британия кырсыктын айланасындагы жагдайларды аныктоо үчүн Индиянын бийлиги менен иштеп жатат.
Индиянын премьер-министри Нарендра Моди Ахмедабаддагы “жүрөк ооруткан” трагедия “нес абалда калтырганын” социалдык медиага жазды.
Британиянын өкмөт башчысы Кир Стармер Лондонго бет алган жана көптөгөн британ жарандарын ташып бараткан “учак кулаган жердеги көрүнүштөр үрөй учурарын” айтты.
Буга чейин Индияда ири авиакырсык 2020-жылы августта болгон. Air India Express авиакомпаниясынын Boeing-737 учагы конуу тилкесинен чыгып кеткенде 21 киши өлгөн.
1996-жылдын 12-ноябрында Чарки Дадри деген жерде Saudi Arabian Airlines компаниясынын учагы менен “Казакстан аба жолдорунун” лайнери асманда кагылышканда 349 кишинин өмүрү кыйылган. Ал Индиядагы эң кыйратуучу кырсык болуп калган.
Шерине