Кыргызстандын Орусиядагы элчиси Кубанычбек Бөкөнтаев Жогорку Кеңеш менен Мамдуманын ортосундагы кызматташтык боюнча парламенттер аралык комиссиянын теңтөрагасы, депутат Дмитрий Кобылкин менен жолугушууда "Бодрость" мончоcунда болгон окуяны көтөрдү.
Кыргызстандын Тышкы иштер министрлиги 17-апрелде тараткан маалыматта элчи мигранттардын уруп-сабалышы боюнча тынчсыздануусун билдирип, бул маселени калыс жана объективдүү кароого чакырганы жазылган.
Кобылкин мындай учурлардын кайталанышына жол бербөө үчүн бул окуяны кылдат иликтөө маанилүү экенин баса белгиленет.
Андан тышкары тараптар миграция жаатындагы жаңы мыйзамдар күчүнө кирип жаткан маалда Орусияда жүргөн кыргызстандыктардын көйгөйлөрүнө өзгөчө көңүл бурушканы жазылат.
Ушул эле күнү Орусиянын Тышкы иштер министрлиги Москвадагы мончодо 10-апрелде өткөрүлгөн рейд боюнча билдирүү таратты. Бул тууралуу ТАСС маалымат агенттиги жазды. Анда мекеме "Бодрость" мончосунда болгон окуяны "коомдук жайларды пландуу текшерүү" деп атады. Билдирүүдө рейд учурунда дээрлик 60 кыргызстандык жаран кармалганы кабарланган. Алардын 25ине Орусиянын миграция мыйзамдарын бузуу боюнча протоколдор түзүлүп, айрымдары "радикалдык топторго тиешеси бар" деген шек менен кармалган. Ошондой эле, күч органдарына каршылык көрсөтүшкөндүктөн күч колдонулганы белгиленген.
Өткөн аптанын аягында социалдык тармактарга Москвадагы мончолордун биринде кыргызстандыктарды орус полициясы жана бети жабылган белгисиз адамдар уруп-сабады делген видео тараган. Анда мигранттарды полиция кызматкерлери колдорун артка кайрып жаткырып, айрымдарын чапкылап жатканын көрүүгө болот.
Ошол учурда мончодо болуп, сабалган мигранттардын бири “Азаттыкка” бул маалыматты ырастап, окуя 10-апрелде болгонун, полиция аларды беш сааттай уруп-сабап, бул убакыт ичинде ар кандай ыкмалар менен кыйнаганын айтып берген.
Социалдык тармактарда кыргызстандыктарды аёосуз сабаган полиция кызматкерлерине сын айтылып, кыргыз бийлигин бул окуяга чукул реакция кылуу талабы жазылып жатат. Ушундай эле талапты Жогорку Кеңеште бир нече депутат коюп, кыргыз өкмөтүнүн ишин сынга алган.
Ал эми Кыргызстандын Тышкы иштер министрлиги Орусиянын элчиси Сергей Вакуновго мончодогу операциянын мыйзамдуулугу, андагы жарандарга күч колдонуунун себептери боюнча маалымат берүү жана күч колдонуу негизсиз болсо, укук коргоо органдарынын өкүлдөрүнө тиешелүү чараларды көрүү өтүнүчү менен расмий нота тапшырган.
Тышкы иштер министри Жээнбек Кулубаев коопсуздуктан улам сабалган кыргызстандыктар арыз жазуудан баш тартканын айткан
Шерине