Словакияда "Интергелпо" кооперативинин Кыргызстанга келишинин 100 жылдыгына арналган иш-чара өттү.
Ага Словакиянын Тышкы жана Европалык иштер министрлигинин мамлекеттик катчысы Растислав Хованец, шаар мэри Петер Фиабане жана Чехиянын Словакиядагы элчиси Рудольф Индрак катышты.
Бул тууралуу Тышкы иштер министрлиги 2-апрелде билдирди.
Жилина шаарында 28-мартта өткөн расмий салтанатты Кыргызстандын бул өлкөдөгү Ардактуу консулдугу уюштурган.
Кыргызстандын Словакиядагы элчиси Төлөндү Макеев убагында словакиялык жана чехиялык интернационалисттер жаш, советтик республиканын өнөр жайына, билим берүү, илим жана маданият багытына чоң салым кошкондугун айтты. Мунун баары азыркы Кыргызстан менен Словакиянын ортосундагы экономикалык жана маданий-гуманитардык байланыштарды чыңдоо үчүн өбөлгө түзгөнүн белгиледи.
Иш-чара алкагында словакиялык тарыхчы Бранислав Красновскийдин “Интергелпо” китебинин бет ачары өттү. Китепти кыргыз тилине тарых илимдеринин доктору Тынчтыкбек Чоротегин которгон.
Китепти басып чыгарууга баш кеңсеси Венада жайгашкан Кыргызстандын Словакиядагы элчилиги жана Кыргызстандын Словакиядагы консулу Тибор Подоба колдоо көрсөткөн.
1925-жылдын 29-мартында ошол кездеги Чехословакиянын Жилина шаарынан Кыргызстандын мурдагы борбору Пишпекке (Фрунзе, азыркы Бишкек) карай чехтерден жана словактардан турган "Интергелпо" кооперативинин мүчөлөрү сапар тарткан. Бул тарыхый окуянын урматына Жилина темир жол бекетинин негизги кире беришине мемориалдык такта орнотулду.
“Интергелпо” кооперативи 1923-жылы Словакиянын Жилина шаарында түзүлгөн.
Тарыхчылардын белгилешинче, кооперативдин мүчөлүк акысы жогору болуп, 3-5 миң кронго (чехтердин улуттук валютасы) чейин жеткен. Акча Кыргызстандын өнөр жайы үчүн керектүү жабдыктарды сатып алууга жумшалган. (ST)
Шерине