Жаза аткаруу мамлекеттик кызматы жабык жайларга уюлдук телефон жана тыюу салынган буюм-тайымдарды киргизгендерге жазаны күчөтүү сунушун берди. Кылмыш-жаза кодексине, Укук бузуулар жөнүндө кодекске өзгөртүүлөрдү киргизүү жөнүндөгү мыйзам долбоору коомдук талкууга коюлду.
Ага ылайык, административдик жазага тартылган адам абакта, тергөө изоляторунда камакта отурган кишиге уюлдук телефон, башка байланыш каражаттарын берүүгө аракет кылса 50 миң сомдон 100 миң сомго чейин айыпка жыгылат же эки жылга чейинки мөөнөткө коомдук жумуштарга тартылышы мүмкүн. Ошондой эле беш жылга чейин эркиндигинен ажыратуу жазасы каралган.
Камактагы адамга мыйзамда тыюу салынган буюмдарды, заттарды же азык-түлүктү берүүгө аракет кылгандарга 17 миң 500 сом айып салуу сунушталды. Абакта жаткан кишиге уюлдук телефон же маалымат берүүчү техника берүүгө аракет жасаган адамга 20 миң сом айып салуу демилгеси көтөрүлдү. Бул административдик жазага тартылбаган кишилерге гана тиешелүү.
Кыргызстанда жабык жайларда жазасын өтөп жаткандар уюлдук телефондорду ээн-эркин колдонуп, эркиндикте жүргөн адамдарды алдап, каражат алган да окуялар болгон. Мыйзам боюнча абакта телефон колдонууга тыюу салынган. (BTo)
Шерине