«Нур Отан» партиясынын лидери, Казакстандын экс-президенти Нурсултан Назарбаев Сенаттын экс-спикери, 20-марттан бери мамлекетти башкарууга киришкен Касым-Жомарт Токаевдин талапкерлигин президенттикке сунуш кыла турганын билдирди. Бул тууралуу Назарбаев бүгүн, 23-апрелде «Нур-Отан» партиясынын XIX жыйынында билдирди.
- Бул кызматка эң татыктуу талапкер деп эсептейм, - деди ал тууралуу Назарбаев.
Казакстандын президенти Касым-Жомарт Токаев Казакстанда мөөнөтүнөн мурда шайлоо 9-июнда өтөрүн жарыялаган. «Нур-Отан» партиясына мүчө болгон Токаев 20-мартта ант берип, президенттиктен кеткен Назарбаевдин ордун баскан.
Дээрлик 30 жылдан кийин мамлекеттик башчылыктан кетсе да, партиянын төрагасы бойдон калган экс-президент Нурсултан Назарбаев 10-апрелде билдирүү таратып, «Нур-Отан» партиясы 23-апрелде кезексиз курултайын өткөрөрүн маалымдаган.
22-апрелде Казакстандын Борбордук шайлоо комиссиясына биринчи талапкер, журналист Садыбек Тугел документин тапшырды. Анын талапкерлигин «Ұлы Дала Қырандары» партиясы көрсөткөн.
