Экзит-полл: Конституцияны дауыс берушілердің 86 пайыздан астамы қолдады
Конституция бойынша референдумның экзит-полл қорытындысы шыға бастады. Еуразиялық интеграция институты жүргізген сауалнама бойынша дауыс берушілердің "86,7 пайызы жаңа Конституцияны қолдаған".
Ал Астана "Социс-А" әлеуметтік зерттеулер институты "87,4 пайыз адам жаңа Конституция жобасын қолдады" дейді.
Референдумда дауыс беру аяқталды, 73 пайыз адам дауыс берді
Орталық референдум комиссиясының мәліметінше, Конституцияны өзгерту бойынша референдумда дауыс бергендердің үлесі 73,24 пайыз болды, яғни, 9 126 850 адам дауыс берген. Жалпы дауыс беруге құқылы азаматтардың саны 12 миллионнан асады.
Дауыс бергендер саны бойынша Қызылорда облысы алда тұр. Ресми мәліметке сенсек, мұндағы сайлаушылардың 93 пайызы таңдау жасаған. Ақтөбе, Шығыс Қазақстан, Түркістан, Жамбыл, Қарағанды, Қостанай облыстарында көрсеткіш 80 пайыздан асқан. Ең төмен көрсеткіш Астана (60 пайыз), Алматы (33 пайыз) қалаларында.
Сағат 20:00-де ел бойынша учаскелер жабылып, дауыс санау басталды.
Дауыс бергендер 70 пайыздан асты
Орталық референдум комиссиясының дерегі бойынша, кешкі 6-дағы жағдай бойынша, жаңа Конституцияға дауыс бергендер 70 пайыздан асқан. Жамбыл, Қарағанды, Қостанай, Түркістан облыстарында сайлаушылардың 80 пайыздан астамы дауыс берсе, Қызылорда облысында көрсеткіш 91 пайыз болған. Алматы қаласында көрсеткіш - 32 пайыз.
Ресми көрсеткіш мынадай:
Абай облысы 73,84 %
Ақмола облысы 77,72 %
Ақтөбе облысы 83,12 %
Алматы облысы 70,27 %
Атырау облысы 71,08 %
Батыс Қазақстан облысы 66,90 %
Жамбыл облысы 81,07 %
Жетісу облысы 73,84 %
Қарағанды облысы 81,44 %
Қостанай облысы 80,11 %
Қызылорда облысы 91,80 %
Маңғыстау облысы 76,84 %
Павлодар облысы 71,85 %
Солтүстік Қазақстан облысы 68,58 %
Түркістан облысы 82,03 %
Ұлытау облысы 70,57 %
Шығыс Қазақстан облысы 83,63 %
Астана қаласы 56,72 %
Алматы қаласы 32,82 %
Шымкент қаласы 74,44 %.
Ресми мәлімет бойынша, 8 845 280 азамат бюллетень алды. Бұл - тізімге енгізілген азаматтардың 70,98 пайызы.
Дауыс беру учаскелеріне келу туралы келесі ақпарат 20.00-дегі жағдай бойынша сағат 20.30-да беріледі.
Тоқаев: президент сайлауы 2029 жылы өз мерзімінде өтеді
Қазақстан президенті Қасым-Жомарт Тоқаев жаңа Конституция жоюасы жөніндегі референдумге дауыс беруге барған кезде журналистер одан вице-президенті лауазымы жайлы сұрады.
"Вице-президент лауазымы туралы әртүрлі әңгіме айтылып жүргенін білемін. Кейбір сарапшылар "Қазақстанда билік ішінде бәсеке өршіп, түрлі үрдістер жүреді, елге зиян келеді" деген пікір білдіруде. Бұл мәселеде қоғамға зардап келетіндей қорқыныш жоқ", деді ол.
Тоқаевтың айтуынша, вице-президент лауазымы "билік институттарын нығайтуы" керек. Ол Қазақстанда кезекті президент сайлау қазіргі Конституцияға сәйкес, 2029 жылы өз мерзімінде өтеді деп мәлімдеді.
Президент Тоқаев жексенбі күні Астанадағы Оқушылар сарайындағы №51 референдум учаскесінде дауыс берді деп хабарлады Ақорда. Дәл сол учаскеде орналасқан ғимаратта бірнеше сағат бұрын полиция бірнеше журналисті ұстап әкетті. Олардың арасында Азаттық тілшісі де бар. Полиция оларды не себепті ұстағанын түсіндірген жоқ.
Бүгін журналистер Астанадағы Президент орталығында Тоқаев референдумге дауыс береді деп күткен еді, алайда ізінше мемлекет басшысы ол "ғимаратта дауыс бермейтіні" айтылды. Бірнеше сағаттан кейін президент Оқушылар сарайындағы референдум учаскесіне барғаны белгілі болды.
Ақорданың хабарлауынша, Тоқаев "дауыс берген соң отандық және шетелдік бұқаралық ақпарат құралдары өкілдеріне арналған брифинг" өткізген. Ол "жаңа Конституция жобасының преамбуласын және басқа да нормаларын өзім жаздым" деген.