Қазақстанның Орталық референдум комиссиясының дерегі бойынша, дауыс беру құқығына ие 12,4 миллион Қазақстан азаматы тіркелген. Дауыс беруге қатысатындар референдум бюллетеніндегі: "Жобасы 2026 жылғы 12 ақпанда бұқаралық ақпарат құралдарында жарияланған Қазақстан Республикасының жаңа Конституциясын қабылдайсыз ба?" деген жалғыз сұраққа жауап беріп, өз таңдауын жасауға тиіс.
ОРК хабарлауынша, елдегі дауыс беру учаскелерінің басым бөлігі жергілікті уақытпен таңертеңгі сағат 7-де ашылады, ал жекелеген арнайы учаскелер одан бір сағат бұрын жұмысын бастайды. Ресми дерек бойынша, елде 10,4 мыңнан астам референдум учаскесі бар, оның 600-ден астамы – арнайы учаскелер – медицина мекемелері, әскери бөлімдер, перзентхана және өзге орындарда орналасқан.
Бұған қоса, Қазақстанның 54 елдегі дипломатиялық өкілдіктерінде 71 сайлау учаскесі жұмыс істейді. Әуелгіде 64 шет мемлекетте 82 сайлау учаскесі ашылады деп жоспарланған, бірақ Таяу Шығыста жағдай күрт ушығып кетуіне байланысты Сыртқы істер министрлігі 11 сайлау учаскесін жабуды ұйғарған.
Қазақстан сыртқы істер министрлігінің хабарлауынша, жексенбі күні Оңтүстік Корея мен Жапония астаналарындағы қазақстандықтар бірінші болып дауыс берген.
Қазақстандағы референдум учаскесінде дауыс беру жексенбі күні сағат 20:00-ге дейін жалғасады.
Бұл жолғы референдумге қазынадан шамамен 20,8 миллиард теңге (42 миллион долларға жуық) қаржы бөлінген.
Қазақстан заңы бойынша, егер ресми тіркелген сайлаушылардың кемінде жартысы дауыс беруге қатысса, референдум өткен болып саналады.
Қазақстан парламенті мәжілісінің төрағасы Ерлан Қошанов жексенбі күні Астанадағы №128 референдум учаскесінде дауыс берді.
Азаттық тілшісі мәжіліс спикері Қошановқа ''Конституцияның тым жиі өзгеруіне алаңдамайсыз ба?” деген сұрақ қойды.
Алматыдағы референдум учаскесінен Азаттық тілшісін шығарып жіберіп, кейін кешірім сұрап қайта кіргізді
Алматыдағы Жетісу аудандық аумақтық референдум комиссиясының төрағасы Жаннат Мұрынова №350 референдум учаскесінің ашылуын және алғашқы дауыс берген азаматтарды суретке түсіріп жүрген Азаттық тілшісі Кенжебек Нұрқасенұлын "Сіз жұмыс істейтін БАҚ Орталық референдум комиссиясында тіркелмеген" деп, референдум учаскесінен шығарып жіберді.
Азаттық тілшісі қолында Сыртқы істер министрлігі берген аккредитациясы барын айтып, редакциялық тапсырмасын тіркеткенімен, аумақтық сайлау комиссиясы жетекшісі журналистің учаскеден кетуін талап етті.
Сәлден кейін аумақтық сайлау комиссиясы жетекшісі Азаттық тілшісінен кешірім сұрап, референдум учаскесіне кіруіне рұқсат етті.
Қазақстан парламенті сенатының төрағасы Мәулен Әшімбаев 15 наурыз күні Астанадағы Ұлттық кітапхана ғимаратында орналасқан референдум учаскесінде дауыс берді.
Азаттық тілшісі сенат төрағасынан: "Егер референдумда халық жаңа Конституцияны қолдамаса, Конституцияға түзету енгізу идеясы кейінге шегеріле ме? Әлде билік жобаны қайта қарастырып, қайта ұсына ма?" деп сұрады.
Мәулен Әшімбаев "бүгін халқымыз қандай шешім қабылдайды, солай болады" деген жауаппен шектілді.