Украина күштерінің тұтқынына түскен солтүстіккореялық сарбаздар Сеул жағына қарай өтуді қаласа, Оңтүстік Кореяның үкіметі оларды қабылдауға дайын және бұл мәселе төңірегінде Украина билігімен ақылдасуды жоспарлап отыр. 14 қаңтар күнгі баспасөз брифинг кезінде Оңтүстік Кореяның сыртқы істер министрлігінің ресми өкілі Ли Чжэ Вон осылай деп мәлімдеді.
Бұған дейін Украина президенті Владимир Зеленский Ресейдің Курск облысында украин күштері екі солтүстіккореялық сарбазды тұтқынға алғанын мәлімеген еді. Зеленскийдің 11 қаңтарда жариялаған видеосында солтүстіккореялық тұтқындардың бірі егер рұқсат берсе, Украинада қалуға қарсы емес екенін де айтқан еді.
"Конституцияға сәйкес, солтүстіккореялық сарбаздар біздің азаматтарымыз болғандықтан [үкімет] Украинамен келіссөз жүргізуді жоспарлап отыр" деді Ли Чжэ Вон.
Оңтүстік Кореяның Конституциясы тұтас Корей түбегін өз аумағы деп санап, іс жүзінде онда тұратындардың барлығын өз азаматы деп есептейді. Сыртқы істер министрлігі өкілінің айтуынша, тұтқынға түскен екі солтүстіккореялықтың екеуі де әзірге Оңтүстік Кореяға өту жөнінде өтініш айтпаған.
12 қаңтарда Зеленский Киев Солтүстік Корея басшысы Ким Чен Ынға тұтқынға алынған солтүстіккореялықтарды Ресейде тұтқында отырған украиналықтарға алмастыруға дайын екенін мәлімдеген.
Батыс барлаушыларының мәліметінше, Ресейге соғыста көмектесу үшін Солтүстік Кореядан шамамен он мың сарбаз әкелінген болуы мүмкін. Олардың арасында адам шығыны мыңнан асқан болуы мүмкін, алайда бұл цирфды растайтын тәуелсіз дереккөз әзірге табылмады. Украина жағының айтуынша, солтүстіккореялықтардың Украинадағы соғысқа қатысып жатқанына дәлел болмас үшін ресейліктер мен солтүстіккореялықтар әдетте жараланғандарды "соңына дейін ұрып-соғады".
Мәскеу мен Пхеньян Ресейге солтүстіккореялықтар әкелінгенін растамаған, терістеген де жоқ.
