ТЖМ ұшақ апатынан мерт болған алты қазақстандықтың аты-жөнін жариялады
Қазақстанның төтенше жағдай министрлігі 25 желтоқсанда Әзербайжанның әуе компаниясының жолаушы ұшағы Маңғыстау облысы аумағында апатқа ұшырағанда қаза тапқан Қазақстанның алты азаматының аты-жөнін жариялады:
- Астана қаласының тұрғыны, нотариус болып жұмыс істеген 49 жастағы Гаухар Шаймерденова мен оның 11 жастағы ұлы Елдар Жұмағат;
- Қарағанды қаласында тұратын 29 жастағы дәрігер Сәлима Жұтаева;
- Жаңаөзен қаласында мұнай компаниясында еңбек еткен 36 жастағы Сәндібек Төлесінов;
- Жаңаөзеннің тағы бір тұрғыны, мұнай компаниясында жұмыс істеген 39 жастағы Бауыржан Жұмағұлов;
- Ақтаулық кәсіпкер, 46 жастағы Галина Махсудова.
Azerbaijan Airlines әуе компаниясының ұшағында болған 67 адамның 38-і қаза тапты. Аман қалған 29 адам Ақтаудағы ауруханаға жеткізілген.
"11 адам жансақтау бөлімінде жатыр, олардың сегіз ес-түссіз жатыр. Ауруханаға түскендердің он үші – Әзербайжан азаматы, тоғызы – Ресей азаматы", – деді Қазақстан премьер-министрінің орынбасары Қанат Бозымбаев сәрсенбі күні кешке Ақтаудағы баспасөз жиынында. Ол қаза тапқандарды анықтау үшін сараптама тағайындалғанын, кейбір мәйітті сараптамасыз анықтау мүмкін емес екенін айтты.
Ресми ақпаратта ұшақ апатынан аман қалып, ауруханаға түскендердің арасында Қырғызстанның үш азаматы мен қай елдің азаматы екені әзірге белгісіз екі адам бары айтылды.
26 желтоқсанда Әзербайжан ұшақ апаты құрбандарын аза тұтады
Бүгін, 26 желтоқсан Әзербайжанда Қазақстанның Маңғыстау облысында болған ұшақ апатынан қаза тапқандарды аза тұту күні деп жарияланған. Елде көпшілік той-думан шаралары өткізілмейді, Бакуде жаңа жылға арнап безендірілген түрлі-түсті жарық көздері өшірілген.
Бір күн бұрын, 25 желтоқсанда Бакуден Грозныйға ұшып шыққан Azerbaijan Airlines әуе компаниясына тиесілі Embraer-190 жолаушы ұшағы Ақтау маңында апатқа ұшыраған. Ресми дерекке сай, ұшақта экипаждың бес мүшесінен бөлек, Әзербайжанның – 37 азаматы, Ресейдің - 16, Қазақстанның - 6, Қырғызстанның 3 азаматы болған.
Ұшақ апатынан 38 адам қаза тауып, 29 адам тірі қалған. Олар Ақтаудағы ауруханаға жатқызылды, жеті адамның жағдайы өте ауыр екені хабарланды. Тірі қалғандар арасында қазақстандықтар жоқ.
Әзербайжан жағы ұшақ апатынан зардап шеккен адамдарды Қазақстаннан жеткізу үшін арнайы рейс те қарастырылғанын хабарлады. Алайда Azerbaijan Airlines әуе компаниясы өкілдерінің айтуынша, дәрігер рұқсат берген жағдайда ғана зардап шеккендер Бакуға әкетілмек.
Маңғыстау облысындағы ұшақ апатынан қаза тапқан қазақстандықтардың отбасыларына қаржылай көмек беріледі. Бұл туралы апатқа байланысты құрылған үкімет комиссиясының сәрсенбідегі отырысында айтылды деп хабарлады Маңғыстау облысы әкімдігінің баспасөз қызметі.
Премьер-министрдің орынбасары Қанат Бозымбаев апаттан зардап шеккендерге қолдау көрсету және қаза тапқандардың үй-ішіне көмек көрсету жөнінде тапсырма берген.
"Ұшақ апатынан қаза тапқан қазақстандықтардың отбасыларына қаржылай көмек көрсетіледі. Бұған қоса, апаттан қайтыс болған шетелдік азаматтардың Маңғыстау облысына келген жақындарына да қажетті көмек беріледі", – деп хабарлады облыс әкімдігі.
Ақтау маңына құлаған Azerbaijan Airlines компаниясы ұшағының ұшқыштар кабинасындағы әңгіме мен ақпаратты жазып алатын арнаулы құрылғысы (ауызекі тілде – "қара жәшік") апат болған аумақтан табылған. Ол қылмыстық іске тіркеледі деді Қазақстан билігінің өкілдері. Ұшақ апаты бойынша тергеуді Қазақстанның құқық қорғау органдары жүргізеді.
"Қылмыстық іс қозғалды, барлық қажетті шаралар жүргізіліп жатыр. Ұшақтың "қара жәшігі" табылып, тергеушілерге берілді, оны іс тіркейді", — деп хабарлады сәрсенбіде Қазақстан көлік прокуратурасының өкілі.
25 желтоқсанда Бакуден Грозныйға жолаушы апара жатқан Azerbaijan Airlines әуе компаниясының ұшағы Ақтау маңына құлады. Ресми дерекке сай, ұшақта экипаждың бес мүшесінен бөлек, Әзербайжанның – 37 азаматы, Ресейдің - 16, Қазақстанның - 6, Қырғызстанның 3 азаматы болған.
Ұшақ апатынан 38 адам қаза тауып, 29 адам тірі қалған. Тірі қалғандар арасында қазақстандықтар жоқ.
Ақтау соты ұшақ құлаған жерді дронға түсірген блогерді 10 күнге қамауға пәрмен берді
Ақтау маңындағы ұшақ апаты аумағын дронға түсірген маңғыстаулық блогер Азамат Сәрсенбаев 10 күнге қамалды. Әкімшілік сот шешімінде Сәрсенбаевтың полицияның талабына қарамастан апат аумағын дронмен және смартфонға түсіргені жазылған.
Сотта блогер өзіне тағылған айыпқа келіспей, BBC, Reuters медиаларындағы әріптестерінің өтініші бойынша аумақты түсіргенін, полицияның жұмысына кедергі келтірмегенін айтқан.
Сот шешімі әлі күшіне енген жоқ. Адвокат шешімді апелляцияға беретінін мәлімдеді.
25 желтоқсанда Бакуден Грозныйға жолаушы апара жатқан Azerbaijan Airlines компаниясының ұшағы Ақтау маңына құлаған. Ұшақта экипаждың бес мүшесінен бөлек, Әзербайжанның – 37 азаматы, Ресейдің - 16, Қазақстанның - 6, Қырғызстанның 3 азаматы болған.
Апат салдарынан 38 адам мерт болып, аман қалған 29 адам Ақтаудағы ауруханаға жеткізілген. Тірі қалғандар арасында қазақстандықтар жоқ.
Ұшақ құлаған күні апат аумағынан ақпарат таратқан Азамат Сәрсенбаевты полиция ұстаған еді.
ПІКІРЛЕР