Ақтаудағы ұшақ апатына Ресей әуе қорғаныс жүйесінің қатысы бар деген болжам айтылды

АҚШ мемлекеттік департаментінің ресми өкілі Мэтью Миллер Azerbaijan Airlines компаниясының жолаушы ұшағының апатқа ұшырауына байланысты көңіл айтты.

"Біз Azerbaijan Airlines компаниясы ұшағы Қазақстан аумағына құлағанын естіп қатты қайғырып отырмыз. Қаза тапқандардың отбасыларымен бірге дұға бағыштап, зардап шеккендердің тезірек оңалып кетуін тілейміз", – деп жазды ол Х әлеуметтік желісіндегі парағына.

Мэтью Миллер АҚШ Қазақстан мен Әзербайжанға қажет көмекті беруге әзір екенін айтқан.

"Біз екі елдің биліктеріне қолдау көрсетуге дайынбыз", – деді Мемлекеттік департамент өкілі.

25 желтоқсанда Қазақстанның Маңғыстау облысы аумағына құлаған Azerbaijan Airlines компаниясының жолаушы ұшағында болған 67 адамның 38-і қаза тауып, 29-ы аман қалған. Қаза тапқандар арасында Әзербайжанның – 23, Қазақстанның 6 азаматы бар.

25 желтоқсанда Ақтау қаласының маңына құлаған Azerbaijan Airlines компаниясына тиесілі Embraer E190AR жолаушы ұшағының ұшқыштар кабинасындағы әңгіме мен ақпаратты жазып алатын арнаулы құрылғы ("қара жәшік") Қазақстанның жедел-тергеу тобына берілген. Бұл туралы Азаттыққа бейсенбі күні Маңғыстау облыстық төтенше жағдайлар департаменті басшысының орынбасары Нұрлыбек Айжарықов айтты.

Ал Маңғыстау облысы полиция департаментінің баспасөз хатшысы Әйгерім Ибатуллаева "қара жәшік" ешқайда әкетілмегенін растады.

Бұған дейін желіде "қара жәшікті Ресейге алып кеткен-мыс" деген ақпарат тараған еді.

Azerbaijan Airlines (AZAL) әуекомпаниясының президенті Самир Рзаев Ақтау маңына құлаған Embraer E190AR жолаушы ұшағында техникалық проблема болған жоқ, ұшақ биыл қазан айында толық жөндеуден өткен деп мәлімдеді. Оның сөзінше, ұшақ жиі тексеріліп тұрған.

Рзаев апатқа ұшыраған ұшақты басқарған ұшқыштар өте тәжірибелі маман болғанын, әрқайсы жиынтығы 15 мың сағат ұшқанын айтты.

Әуе компаниясының басшысы "тергеу жалғасып жатқандықтан қандай да бір гипотеза жасауға әлі ерте" деді. Бұл туралы Азаттықтың Әзербайжан қызметі хабарлады.

AZAL әуекомпаниясының Embraer E190AR жолаушы ұшағы 25 желтоқсанда Қазақстанның Маңғыстау облысы аумағына құлап, ұшақта болған 67 адамның 38-і қаза тауып, 29 тірі қалған. Аман қалған адамдар Ақтаудағы ауруханаға жатқызылды.

Azerbaijan Airlines компаниясының Embraer E190AR жолаушы ұшағы ең алғаш рет 2013 жылы шілде айында сапарға шыққан деп хабарлады маңғыстаулық Lada.kz басылымы. Содан бері ұшақ бір ғана компанияның меншігінде болған, бірнеше жыл оның Buta Airways деген еншілес компаниясы пайдаланған.

4K-AZ65 тіркеу нөмірі берілген ұшақ Бакуден Ресейдің Волгоград, Самара, Қазан, Астрахань мен Грозный қалаларына, сонымен бірге Ақтау, Бішкек, Тбилиси және Трабзон қалаларына жолаушы тасыған. Flightradar сервисінің дерегі бойынша, бұл ұшақ 20 желтоқсанда Ақтау әуежайына қонып, қайтадан ұшып кеткен деп жазды Lada.kz.

Маңғыстауда болған ұшақ апатынан аман қалып, ауруханаға жеткізілген адамдардың екеуінің жағдайы аса ауыр деп хабарлады бейсенбіде Қазақстанның денсаулық сақтау министрлігі.

"11 науқастың жағдайы ауыр, 14-інің жағдайы орташа ауыр дәрежесінде, 2 адамның ахуалы қанағаттанарлық жағдайда", – деді министрлік.

Апаттан зардап шеккен сегіз адам өкпені жасанды желдету аппаратының көмегімен тыныстап жатыр.

Ресми дерекке сай, 25 желтоқсанда Ақтау қаласы маңында апатқа ұшыраған Әзербайжанның жолаушы таситын ұшағында болған 67 адамның 38-і мерт болып, әртүрлі дәрежедегі жарақат алған 29 адам Ақтаудағы облыстық ауруханаға жеткізілген.

Денсаулық сақтау министрлігі ұшақ апатынан зардап шеккендерге қажетті медициналық көмек көрсетіліп жатқанын, ем-домға керек дәрі-дәрмек пен медициналық құрал-жабдық жеткілікті деп хабарлады.

26 желтоқсан таңертең Ресейдің арнаулы ұшағы 9 ресейлік азаматты Ақтау ауруханасынан Мәскеуге алып кеткен. Дәрігерлер олардың жағдайы ауыр, дегенмен жол жүруді көтереді деп айтқан.

Azerbaijan Airlines әуекомпаниясының ұшағында болған Қазақстанның 6 азаматы түгелдей қазаға ұшырады. Олардың арасында жасы кәмелетке толмаған бір ұл бар.