ҚАЙСАР ЖАНДАРДЫҢ БИ ЖАРЫСЫ
Тән азабын тартса да, жандарын жүдетпеген мүмкіндігі шектеулі адамдардың алғашқы республикалық би фестиваліне Қостанаймен бірге Астана, Ақтөбе, Тараз, Атырау, Екібастұз қалаларынан үміткерлер қатысып, өнерлерін ортаға салды.
Конкурстық жұптардың өзі 10 болса, көрсетілімдік бағдарламаға қатысушылар саны одан да көп болды. Таңдаулы би мамандарынан құрылған қазылар алқасын Қазақстанның спорт билері федерациясының президенті Денис Есауленко басқарды.
Көрермендер қатысушылардың орындауындағы вальс, румбо, танго секілді билермен қатар көңілді әрі әзілге құрылған билерді де көріп тамашалады. Тараздан келген Руфия және Зульфия Ғабидулиналар «Қос жүрек» биін келістіріп биледі. Біреуі мүгедектер арбасында отырып, ал екіншісі оған сүйене жүріп билеген бұл екеуінің жарасымды жұбы көрермендер ықыласына ие болды.
СПОРТТЫ ДА, БИДІ ДЕ СЕРІК ЕТКЕН
«Спорттың параолимпиадалық түрлері Қазақстанда да кейінгі уақытта қанат жайып келеді. Олардың Олимпиада биігінен көрінуіне әзір ертерек болса да, осындай жарыстар жиі ұйымдастырылып тұрса, көңілге үміт ұялайды, бұл жарысқа қатысушылардың биді жан-тәнімен билегені соншалық, тіпті баға беруде бірін кем бағалап қоямыз ба деп өзіміз қысылып қалдық», - дейді Денис Есауленко.
Ал олардың командалас әріптестері Дана Малғаждарова мен Владимир Каплич жеңіс тұғырында екінші орынға көтерілді. Дананың би өнерінде бірсыпыра тәжірибесі болса, Владимир жарысқа алғаш қатысып отыр екен. Бірақ, ол да, Оксана де белгілі спортшылар.
Владимир Каплич – стол теннисінен Қазақстанның 18 мәрте чемпионы, көптеген халықаралық турнирлерге қатысқан танымал спортшы. Оксана Лим – мүгедектер арбасымен жарыстың чемпионы, 400 метрді небәрі 1,4 минутта жүріп өткен.
Сондықтан да оларға бұл өнерге төселу аса қиынға соқпаған, дегенмен, олардың жаттықтырушыларының сөздеріне сүйенсек, бишілерге пластика бағытында әлі де тер төгуге тура келеді.
БИГЕ АРНАЛҒАН АРБА ТАПШЫ
Мүмүкіндігі шектеулі адамдар арасында өткен республикалық алғашқы би жарысын ұйымдастырған Қостанайдағы «Yмiт - Надежда» қоғамдық бірлестігі төрағасының орынбасары Аруна Жақсығұлова Мәдениет және ақпарат министрлігі өткізген «Арттерапия» лоты бойынша грантты қостанайлықтар жеңіп алғанын, соның нәтижесінде бұл жарыс тиісті деңгейде өтіп жатқанын тілге тиек қылып, өзінің бұл жеңіске жетуін республикадағы қозғалысы қиын кісілерге көрсеткен дем беру деп есептейтінін жеткізді.
Қостанайлықтар аталмыш байқауға тыңғылықты әзірленген. Жарыс қарсаңында Москва қаласынан мүгедектерді би өнеріне үйрету фрагменттері жазылған дискілерді арнайы сұратып алдырған. Санкт-Петербург қаласына арнайы тапсырыс беріліп, би билеуге лайықталған мүгедектер арбалары алынған. Өкінішке қарай, мұндай арбалар Қазақстанда мүлде жоқ көрінеді.
Спорт билері Қостанай облыстық федерациясының төрағасы Андрей Нужныйдың сөзіне қарағанда, республиканың спорт билері федерациясы қостанайлықтармен келісімшартқа отырып, бұл игілікті істі келешекте одан әрі жалғастырмақ ниетте.
