Иран жақын арада Ресейге жүздеген баллистикалық ракета береді. Бұл жөнінде барлау қызметіндегі екі дереккөзге сүйенген Reuters хабарлады.
Reuters дереккөздерінің айтуынша, одан бөлек қазір ондаған ресейлік әскери қызметкер Иранда қысқа қашықтыққа ұшатын Fath-360 тактикалық ракетасын пайдалануды үйреніп жатыр. Бұл ракеталар 30-75 шақырымға дейін ұшады, 150 килоға дейін әскери заряд тасымалдай алады. Fath-360 спутник нұсқаулығын да пайдалана алады.
Барлау қызметі өкілдерінің болжамынша, Мәскеу өкілдері Тегеранмен Fath-360 кешендерін тасымалдау және өзге де бірнеше баллистикалық ракетасын жеткізу бойынша келісімді былтыр 13 желтоқсанда жасасқан болуы мүмкін.
Reuters-тің жазуынша, АҚШ ұлттық қауіпсіздік кеңесінің өкілі Иранның Ресейге мұндай қару түрін жеткізуі Украинаға қарсы басқыншылықты ушықтыру болып бағалануы мүмкін және АҚШ, НАТО мен "Үлкен жетілік" елдері бұған "жылдам әрі қатаң жауап беруі ықтимал" деген.
ПІКІРЛЕР