Иранда президент сайлауының екінші кезеңінде реформист Масуд Пезешкиан жеңіске жетті деп хабарлады IRNA агенттігі.
Пезешкиан 16,4 млн-ға жуық дауыс алды, ал оның қарсыласы Саид Джалили 13,5 млн дауысқа ие болды. Бір апта бұрын өткен президент сайлауының бірінші кезеңінде Пезешкиан миллионға жуық дауыс алған. Елде әйелдер мен радикал оппозиционерлерге сайлауға түсуге тыйым салынған.
Иранның тарихында президент сайлауының екінші кезеңі тек 2005 жылы болған. Мұнда 61 млн-нан астам адамның дауыс беруге құқығы бар. 5 шілдеде сайлау учаскесіне тек жартысы келген.
Mehr агенттігінің жазуынша, дауыс беру Конституцияда қарастырылған мерзімнен (10 сағат) алты сағат ұзағырақ болған.
Оппозиция сайлауды "цирк" деп атап бойкотқа шақырды. Кейінгі апталарда ирандықтар әлеуметтік желіде #ElectionCircus хэштегін жиі пайдаланған.
Кезектен тыс сайлау 2024 жылы мамырда президент Ибрахим Раиси ұшақ апатынан қаза болғаннан кейін тағайындалған еді.
Иранда президенттің өкілеті шектеулі, алайда ол Батыс елдерімен қарым-қатынастың сипатына әсер ете алады.
