Ուկրաինայի նախագահ Վլադիմիր Զելենսկին ողջունել է «շոշափելի առաջընթացը» հնարավոր խաղաղապահ ուժերի ստեղծման հարցում ֆրանսիացի և բրիտանացի ռազմական առաջնորդների հետ հանդիպումից հետո:
«Կա շոշափելի առաջընթաց և առաջին մանրամասներն այն մասին, թե ինչպես կարող է տեղակայվել գործընկերների անվտանգության զորակազմը», - ապրիլի 5-ին սոցիալական ցանցում նշել է Զելենսկին առանց այլ մանրամասների:
Այս հայտարարությունները հնչել են այն բանից հետո, երբ ուկրաինացի բարձրաստիճան զինվորականները Կիևում հանդիպել են Մեծ Բրիտանիայի պաշտպանության շտաբի պետ Թոնի Ռադակինի և ֆրանսիացի պաշտոնակցի՝ Թիերի Բուրկհարդի հետ:
Մարտի սկզբին Մեծ Բրիտանիայի վարչապետ Քիր Սթարմերը հայտարարեց «կամեցողների կոալիցիայի» ձևավորման մասին՝ Ուկրաինայում ռազմական առաքելություն տեղակայելու համար:
«Կամեցողների կոալիցիայի» հետ միասին մենք շարունակում ենք մեր քննարկումները ուկրաինացի ժողովրդին երկարաժամկետ աջակցության վերաբերյալ», - ապրիլի 5-ին Facebook-ում գրել Է Ֆրանսիայի նախագահ Էմանյուել Մակրոնը:
Մեծ Բրիտանիայի պաշտպանության նախարար Ջոն Հիլին նախատեսում է ապրիլի 10-ին Բրյուսելում ընդունել ԵՄ երկրների պաշտպանության նախարարներին՝ քննարկելու Ուկրաինայի հարցը:
