ԴՕԿ կուսակցության ղեկավար, նախկին ռազմական ոստիկան Վարդան Ղուկասյանի միգրացիոն խնդրիներին առնչվող դատական նիստն այսօր մեկ շաբաթով հետաձգվել է: Թե ինչ պատճառաբանությամբ, փաստաբան Լևոն Բաղդասարյանը չմանրամասնեց:
Պարզ չէ նաև, թե արդյոք մինչև հաջորդ դատական նիստը ԴՕԿ կուսակցության նախագահը կշարունակի մնալ ձերբակալվածների ժամանակավոր պահման վայրում:
Վարդան Ղուկասյանի գործով դատավարությունը նախատեսված էր Լաս Վեգասում:
Հայաստանում Ղուկասյանը մեղադրվում է խարդախության, շորթման, սպառնալիքի, բռնության հրապարակային կոչերի համար, մեղքը, սակայն, չի ընդունում:
Թե որտեղ է անցած 10 օրերին պահվում Վարդան Ղուկասյանը, ո՛չ նրա կուսակցության անդամները և ո՛չ էլ փաստաբանը չեն բացահայտել: Սակայն անցած շաբաթ ԱՄՆ-ի Միգրացիոն և մաքսային ծառայության կայքը տեղեկացրեց, որ Հայաստանում ծնված Վարդան Յուրիկի Ղուկասյանը գտնվում է Նևադա նահանգի Հենդերսոնի ձերբակալվածների ժամանակավոր պահման վայրում:
Ղուկասյանի փաստաբանն այսօր «Ազատության» հետ զրույցում վերահաստատել էր՝ դատական նիստը վերաբերում է ԱՄՆ ներգաղթի կանոնների խստացմանը, սակայն Լևոն Բաղդասրյանը վստահություն էր հայտնել, որ այս առումով Ղուկասյանը որևէ խնդիր չունի:
