ԱՄՆ Գլոբալ Մեդիայի գործակալությունը (USAGM) խզել է պայմանագրերը արբանյակային երկու ծառայությունների հետ, որոնք հեռարձակում էին «Ազատություն/Ազատ Եվրոպա» մեդիակորպորացիայի CurrentTime/Настоящее Время նախագիծը։
Настоящее Время հեռուստաալիքը երեկ հաղորդեց, որ «Ազատության» աշխատանքը կարգավորող USAGM-ի որոշումից հետո Astra և Eutelsat արբանյակներով հեռարձակումները դադարել են։ Hotbird համակարգով, սակայն, այն դեռ շարունակվում է։ USAGM-ն իր որոշումը որևէ կերպ չի պատճառաբանել։
«Մենք ծանուցում ստացանք USAGM-ից, որ Current Time-ի ռուսերեն հեռուստահաղորդումները տարածող արբանյակների հետ պայմանագրերը դադարեցվում են: Հուսով ենք, որ ապագայում այս որոշումը կչեղարկվի», - հայտարարել է «Ազատություն» ռադիոկայանի նախագահ Սթիվեն Կապուսը:
«Ազատություն» ռադիոկայանը անկախ և անաչառ տեղեկատվություն է սփռում 23 երկրներում, 27 լեզուներով, այդ թվում՝ Ռուսաստանում, Բելառուսում, Իրանում։ Երեք շաբաթ առաջ ԱՄՆ նախագահ Դոնալդ Թրամփը հրամանագիր ստորագրեց յոթ գործակալություններ, ներառյալ USAGM-ը «օրենքով հնարավոր առավելագույն աստիճանի» կրճատելու մասին։
Հրամանագրի ստորագրումից անմիջապես հետո ԱՄՆ նոր վարչակազմի կողմից նշանակված USAGM-ի ժամանակավոր ղեկավարությունը հայտարարեց «Ազատություն» ռադիոկայանի ֆինանսավորումը դադարեցնելու մասին: Մեդիակորպորացիան այս որոշումն անօրինական է համարում և դատական հայց է ներկայացրել USAGM-ի դեմ:
Մարտի 25-ին ԱՄՆ-ի դատարանը բավարարել է «Ազատություն» ռադիոկայանի՝ ժամանակավոր խափանման միջոց կիրառելու միջնորդությունը՝ USAGM-ի գործողությունները համարելով «կամայական»: Թեև դրանից հետո USAGM-ը հայտարարեց, որ չեղյալ է հայտարարում ԱՄՆ Կոնգրեսի կողմից հատկացված դրամաշնորհը սառեցնելու որոշումը, սակայն մինչ օրս այդ միջոցները «Ազատությանը» չի փոխանցել։
Ապրիլի 1-ից «Ազատություն» ռադիոկայանը ստիպված է որոշ աշխատակիցների ուղարկել հարկադիր պարապուրդի։ Մեդիակորպորացիան դեռ սպասում է USAGM-ի պաշտոնական հաստատմանը, որ Կոնգրեսի կողմից տրամադրված ֆինանսավորումը շարունակվելու է։
