ԱՄՆ նախագահ Դոնալդ Թրամփը փետրվարի 10-ին հայտարարել է Միացյալ Նահանգներ ներմուծվող պողպատի և ալյումինի բոլոր ապրանքների վրա 25 տոկոս մաքսատուրքեր սահմանելու մասին:
Թրամփը հրամանագրեր է ստորագրել ԱՄՆ-ում ալյումինի սակագնի դրույքաչափը 25 տոկոսով բարձրացնելու մասին նախկին 10 տոկոսի համեմատ: Սպիտակ տան ներկայացուցիչը հաստատել է, որ այդ միջոցներն ուժի մեջ կմտնեն մարտի 4-ին:
Սակագները կկիրառվեն նաև միլիոնավոր տոննա պողպատի և ալյումինի վրա, որոնք ներմուծվում են Կանադայից, Բրազիլիայից, Մեքսիկայից, Հարավային Կորեայից և այլ երկրներից, որ արտոնությունների շրջանակներում առանց մաքսատուրքի էին հասնում Նահանգներ:
Այս քայլը «կթեթևացնի» մետաղների սակագները, Սպիտակ տանը լրագրողներին ասել է Թրամփը:
«25 տոկոս է առանց բացառությունների։ Դա վերաբերում է բոլոր երկրներին, անկախ նրանից, թե որտեղից են դրանք գալիս, բոլոր երկրներին», - ասել է նա։
Համաձայն վիճակագրության՝ Կանադան, Բրազիլիան, Մեքսիկան և Հարավային Կորեան պողպատի ամենամեծ մատակարարներն են ԱՄՆ: Կանադան ապահովում է ներմուծվող ալյումինի գրեթե 80 տոկոսը:
Թրամփի վարչակազմը ավելի վաղ հայտնել էր, որ փետրվարի 4-ից նախատեսում է 25 տոկոս մաքսատուրքեր սահմանել Կանադայից և Մեքսիկայից ներմուծվող ապրանքների, ինչպես նաև 10 տոկոս՝ Չինաստանից ներմուծման համար։ Սակայն այդ ժամկետից անմիջապես առաջ ԱՄՆ-ն, Կանադան և Մեքսիկան պայմանավորվեցին հետաձգել տուրքերի կիրառումը։
