ԱՄՆ նախագահ Դոնալդ Թրամփը փետրվարի 10-ին հայտարարել է, որ այս շաբաթ կխոսի Ուկրաինայի նախագահ Վլադիմիր Զելենսկու հետ, իսկ Ուկրաինայի և Ռուսաստանի հարցերով նրա հատուկ բանագնացը շուտով կմեկնի Ուկրաինա:
Թրամփը չի հայտնել, թե երբ բանագնաց Քիթ Քելլոգը կայցելի Ուկրաինա: CNN-ը գրում է, որ այցը տեղի կունենա հաջորդ շաբաթ, իսկ AFP-ն, հղում անելով Ուկրաինայի նախագահի վարչակազմի աղբյուրին, հայտնում, որ այն նախատեսված է փետրվարի 20-ին:
Ակնկալվում է, որ Քելլոգը կհանդիպի Վլադիմիր Զելենսկու հետ Մյունխենի անվտանգության համաժողովում, որը մեկնարկում է փետրվարի 14-ին:
«Մենք մեր սպասելիքները կհասցնենք դաշնակիցների ուշադրությանը», - ասել է Քելլոգը Associated Press-ին տված հարցազրույցում, - «Երբ մենք վերադառնանք Մյունխենից, մենք ցանկանում ենք նախագահին տարբերակներ ներկայացնել, որպեսզի երբ նա (ուղղակիորեն) ներգրավվի խաղաղության գործընթացում, իմանա, թե դա ինչպիսին կլինի իր համար»:
Թրամփը պնդում է, որ պատերազմը շուտ ավարտվի, մինչդեռ Զելենսկին կարևորում է անվտանգության ամուր երաշխիքներ ստանալը Ռուսաստանի հետ ցանկացած գործարքի շրջանակներում:
Կիևը մտավախություն ունի, որ ցանկացած համաձայնագիր, որը չի ներառի կոշտ ռազմական պարտավորություններ, ինչպիսիք են ՆԱՏՕ-ին անդամակցությունը կամ խաղաղապահ զորքերի տեղակայումը, Կրեմլին ժամանակ կտա վերախմբավորվելու և վերազինվելու նոր հարձակման համար:
