Սիսիանում այսօր հուղարկավորեցին 21-ամյա ժամկետային զինծառայող Արտակ Վարդանյանին: Համայնքի ղեկավար Հովսեփ Առաքելյանը վստահեցրեց, թե զինվորի մահվան հանգամանքներից տեղյակ չէ:
Հոսպիտալում ժամեկտային զինծառայողի մահվան լուրը Պաշտպանության նախարարությունը հայտնեց երկու օր առաջ՝ առանց նշելու կոնկրետ հիվանդությունը: Գերատեսչության խոսնակ Արամ Թորոսյանն ասել էր, թե հարցի պատասխանը կտա փորձաքննությունը:
Բայց, մինչ արդյունքներն էլ կառույցից արդեն հայտարարել են, թե բժշկական նախնական գնահատականով հիվանդությունն ունեցել է կայծակնային ընթացք, իսկ զինվորի կյանքը փրկելու բժիշկների ջանքերն անցել են անարդյունք:
Հելսինկյան քաղաքացիական ասամբլեայի Վանաձորի գրասենյակի իրավապաշտպան Անուշ Պետրոսյանի փոխանցմամբ՝ իրենք նախնական տեղեկություն ունեն՝ զինվորը մահացել է թոքաբորբից:
«Մեզ հասած տեղեկություններով՝ մահը վրա է հասել թոքաբորբի պատճառով: Այսինքն՝ թոքաբորբը չէր կարող կայծակնային արագությամբ ի հայտ գալ: Տարել են իրեն մարտական հերթապահության, վատացել է, ու տեղափոխել են նոր հոսպիտալ», - ասաց նա:
Տեղեկությունը, որ ժամկետային Վարդանյանը մահացել է թոքաբորբից, Պաշտպանության նախարարությունից չեն հերքել: Այդուհանդերձ, խոսնակն այսօր ոչ մի նոր բան չասաց՝ կրկին առաջարկելով սպասել դատաբժշկական փորձաքննությանը:
Իրավապաշտպան Ժաննա Ալեքսանյանը, որ երկար տարիներ է՝ զբաղվում է զինծառայողների ու բանակի խնդիրներով, ողբերգության գլխավոր պատասխանատու է համարում վարչապետին:
«Այս դեպքի ուղիղ պատասխանատուն Նիկոլ Փաշինյանն է, ով բոլորովին վերջերս հայտարարեց, որ բանակում գեթ մեկ խնդիր չկա: Ինքը դրանով բարձրագույն զինվորական կազմին ասաց, որ թքած ունեցեք, ինչ ուզում է՝ թող լինի: Երբ ասում է՝ գեթ մեկ խնդիր չկա, ինչպե՞ս պետք է ներսում կատարեն իրենց պարտականությունները», - նշեց նա:
Իրավապաշտպանը նկատի ունի մոտ մեկ ամիս առաջ՝ Բանակի օրվա առթիվ վարչապետի ելույթը:
Արտակ Վարդանյանը ծառայում էր Իջևանի զորամասում: Այստեղ վերջին մեկ շաբաթում սա երկրորդ ողբերգությունն է: Անցած շաբաթ էլ հաղորդվեց 19-ամյա զինծառայող Սևակ Հովհաննիսյանի մահվան մասին:
Այս տարի երկու, իսկ անցած տարի մահվան 36 դեպք է գրանցվել ոչ մարտական պայմաններում, իրավապաշտպան Անուշ Պետրոսյանի փոխանցմամբ՝ դրանցից 5-ը՝ առողջական խնդիրների պատճառով: Զինվորների հարազատները, ըստ իրավապաշտպանի, հաճախ են ահազանգում բուժօգնության վատ որակից:
Ժաննա Ալեքսանյանն էլ ասաց, որ իրենց ուսումնասիրությունները փաստում են, որ զինվորների բողոքները հաճախ անտեսվում են:
Քննչական կոմիտեից «Ազատությանը» փոխանցեցին՝ Արտակ Վարդանյանի մահվան դեպքով նախաձեռնվել է քրեական վարույթ՝ բուժաշխատողի կողմից մասնագիտական պարտականությունները չկատարելու կամ ոչ պատշաճ կատարելու հոդվածով: Այս պահին մեղադրյալներ չկան:
Մանրամասները՝ «Ազատության» ռեպորտաժում.
