Բաքուն ուշ երեկոյան որոշ մանրամասներ է հայտնել այսօր շարունակված դատավարությունից, որին մասնակցել է ութերորդ օրը հացադուլ անող Արցախի նախկին պետնախարար Ռուբեն Վարդանյանը:
Ադրբեջանական պետական «Ազերթաջ» գործակալության հաղորդմամբ՝ նիստի ընթացքում Ռուբեն Վարդանյանի ինքնազգացողությունը վատացել է հացադուլի պատճառով, հրավիրվել է բժիշկ, ընդմիջումից հետո նիստը շարունակվել է:
Նիստը լուսաբանող իշխանական լրատվամիջոցը փոխանցում է, որ Վարդանյանը հրաժարվել է ցուցմունք տալ, ինչպես նաև չի պատասխանել մեղադրողների որևէ հարցի:
Արցախի նախկին պետնախարարն ընտանիքի միջոցով ավելի վաղ հայտնել է, որ հացադուլի միջոցով բողոքում է դատական ֆարսի դեմ:
Ծավալուն հայտարարությունում նա պատմել է իր իրավունքների կոպտագույն խախտումների, հոգեբանական ճնշումների մասին, նաև, որ զրկված է պաշտպանության իրավունքից, 422 հատորանոց ու սխալներով թարգմանված գործի նյութերին ծանոթանալու բավարար ժամանակ չեն տրամադրել, իսկ իր միջազգային իրավաբանական թիմին արգելվել է շփվել կամ հանդիպել իր հետ ու ստանալ գործի նյութերը:
Հայաստանում կամ Արցախում որևէ ռազմական գործողության չմասնակցած նախկին պետնախարարին մինչև ցմահ ազատազրկում է սպառնում: Բաքուն նրան մեղադրում է «Ադրբեջանի դեմ պատերազմ ծրագրելու ու վարելու, վարձկանության» ու էլի 40-ից ավելի հանցագործությունների մեջ:
