Զանգեզուրի պղնձամոլիբդենային կոմբինատի 2 հազար 448 աշխատակից «այո» է ասել աշխատավարձերի բարձրացման և աշխատանքային պայմանները բարելավելու պահանջին:
Կոմբինատում, ըստ ընկերության պաշտոնական տվյալների, աշխատում է ավելի քան 4 հազար 600 մարդ։
Ընկերության պատմության մեջ առաջին անգամ քվեարկություն կազմակերպած և արդեն չորս օր գործադուլ անող աշխատակիցները այս կերպ փորձում էին ապացուցել, որ տնօրինությունը «ստում է», երբ պնդում է, թե աշխատողների ընդամենը 7-8 տոկոսն է պահանջում աշխատավարձի բարձրացում և աշխատանքային պայմանների բարելավում։
Պղնձամոլիբդենային կոմբինատը նախորդ օրերին պնդում էր, թե գործադուլի դուրս եկած քաղաքացիները աշխատավարձի անիրատեսական բարձրացում են պահանջում՝ սպառնալով իրավական պատասխանատվության ենթարկել խախտումներ կատարողներին:
Հայաստանի լեռնագործների, մետալուրգների և ոսկերիչների արհեստակցական կազմակերպությունների ճյուղային հանրապետական միության նախագահ Էդուարդ Փահլևանյանն «Ազատությանն» ավելի վաղ փոխանցել էր, որ իրավիճակը հանգուցալուծելու համար աշխատավարձի բարացրացման և պայմանների բարելավման հարցի շուրջ քվեարկության ավարտից հետո կհանդիպեն կոմբինատի ղեկավարությանը։
Հաշվարկից հետո նախատեսվում է հանձնաժողովի ստեղծում, որն էլ աշխատակիցների պահանջներով վաղը առավտյան ներկայանալու է բանակցությունների, հավելել է Էդուարդ Փահլևանյանը:
Պղնձամոլիբդենային կոմբինատից էլ ասել էին, որ իրենց դիրքորոշումը կհայտնեն իրավական գործընթացի ավարտից հետո:
Կառավարությունը, որը Նիկոլ Փաշինյանի իշխանության գալուց հետո կոմբինատի 22 տոկոսի սեփականատերն է, առայժմ չի արձագանքել արդեն 4 օր շարունակվող գործադուլին և աշխատողների պահանջներին։
