Գյումրիի ընտրություններին մասնակցող «Մեր քաղաքը» դաշինքի ցուցակը գլխավորող Մարտուն Գրիգորյանն ահազանգում է իր թիմի նկատմամբ ճնշումների մասին: Այսօր օրվա երկրորդ կեսին հրավիրված մամուլի ասուլիսի ժամանակ Գրիգորյանն ասաց, որ անհայտ անձինք առևանգել են իրենց ցուցակում ընդգրկված ավագանու թեկնածու Անահիտ Խալաթյանին, և որ այս պահին հայտնի չէ նրա գտնվելու վայրը:
Հակակոռուպցիոն կոմիտեից «Ազատությանը» հայտնել են, որ ավագանու թեկնածուն և մի շարք այլ անձինք ձերբակալվել են Կոմիտեի աշխատակիցների կողմից՝ հանցանք կատարելու անմիջականորեն ծագած կասկածի հիմքով:
Բացի այդ, Մարտուն Գրիգորյանի խոսքով՝ դաշինքի ավագանու անդամության թեկնածուների, իր թիմակիցներին մեքենաներն են կանգնեցնում և կա՛մ վարորդներով, կա՛մ առանց վարորդների, մեքենաները տարվում են անհայտ ուղղությամբ:
Նրա խոսքով՝ նաև ահազանգեր ունեն, որ ընտրատեղամասերում քաղաքացիներին չի տրվում 8-րդ համարի քվեաթերթիկը, որը իրենց դաշինքինն է:
Իրավապահ կառույցները դեռևս պարզաբանմամբ հանդես չեն եկել վերջին հայտարարության առնչությամբ:
Հիշեցնենք, որ նախընտրական շրջանում ուժայինները խուզարկություն էին իրականացրել քաղաքական ուժի գրասենյակում։ Ձերբակալվել էին Մարտուն Գրիգորյանի որդին և հայրը: Մեկօրյա ձերբակալությունից հետո դատարանն ազատ էր արձակել Գյումրիի քաղաքապետի ընդդիմադիր թեկնածուի ընտանիքի անդամներին:
Դատարանը միաժամանակ բավարարել էր Հակակոռուպցիոնի միջնորդությունը՝ արգելել երեկոյան 8-ից առավոտյան 8-ը լքել բնակարանը, նաև շփվել գործով անցնող մյուս անձանց հետ: Ընտրություններից երկու օր առաջ տեղի ունեցածը փաստաբան Արսեն Բաբայանը որակել էր մեղադրյալների քաղաքական իրավունքների սահմանափակում:
Ձերբակալություններից հետո իրավապահները 8 հոգու մեղադրանք էին առաջադրել: Մեղադրյալներից երեքը «Մայր Հայաստանից» են: Հակակոռուպցիոն կոմիտեն ընդդիմադիրներին մեղադրում է ընտրակաշառք տալու, ստանալու, ընտրության ժամանակ բարեգործության արգելքը խախտելու հոդվածներով:
