Հյուսիսային Կորեայի առաջնորդ Կիմ Չեն Ընը փետրվարի 8-ին խոստացել է, որ իր երկիրը կշարունակի աջակցել Ռուսաստանին Ուկրաինայի հետ պատերազմում: Նա նաև սպառնացել է ուժեղացնել իր միջուկային ուժերը՝ տարածաշրջանում Ճապոնիայի և Հարավային Կորեայի հետ ԱՄՆ ռազմական համագործակցությանը դիմակայելու համար:
Ըստ պետական ԶԼՄ-ների՝ նա ասել է, որ Փհենյանը չի ցանկանում տարածաշրջանում իրավիճակի անհարկի սրում, բայց «մշտական հակաքայլեր կձեռնարկի տարածաշրջանային ռազմական հավասարակշռության ապահովման համար»:
Արևմտյան առաջնորդներն ու ուկրաինացի պաշտոնյաները պնդում են, որ անցյալ տարվա աշնանից Հյուսիսային Կորեան շուրջ 11 հազար զինծառայող է ուղարկել հիմնականում Ռուսաստանի Կուրսկի շրջան՝ Կրեմլի զորքերի հետ կողք կողքի կռվելու:
Նրանց ներկայիս կարգավիճակն անորոշ է, քանի որ որոշ հետախուզական աղբյուրներ հայտնում են, որ շատ զինծառայողներ դուրս են բերվել առաջնագծից՝ ուկրաինական զորքերի հետ մարտերում սարսափելի կորուստներ կրելուց հետո:
Սակայն Ուկրաինայի նախագահ Վլադիմիր Զելենսկին փետրվարի 8-ին հայտարարել է, որ «Ռուսաստանի համագործակցությունը Հյուսիսային Կորեայի հետ կշարունակի ընդլայնվել»:
Կրեմլը և Փհենյանը ոչ մի կերպ ուղղակիորեն չեն մեկնաբանել Ռուսաստանում հյուսիսկորեական զորքերի տեղակայումը կամ ծանր կորուստների մասին հաղորդագրությունները:
