Սյունիքի մարզի սահմանամերձ Խնածախ գյուղի ուղղությամբ այսօր գիշերը կրակոցներ են եղել, տեղացիները լսել են դրանց ձայները, «Ազատությանը» հայտնեց վարչական ղեկավար Սեյրան Միրզոյանը:
«Ժամը 10:20-ից սկսած, փոփոխական ժամեր են, մինչև առավոտվա 4:30: Լինում է մի քանի վայրկյան, հետո դադար են տալիս ու նորից», - ասաց նա:
Սեյրան Միրզոյանի խոսքով՝ ադրբեջանական ԶՈւ-ի կրակոցները նախորդ օրերին ավելի ինտենսիվ են եղել:
Հայաստանի պաշտպանության նախարարությունը մարտի 31-ին հաղորդեց՝ այդ գիշեր ադրբեջանական կողմը կրակել է Խնածախի ուղղությամբ՝ վնասելով բնակելի տուն: ՊՆ-ն կից լուսանկարներ էր հրապարակել, դրանցում գետնին ընկած պարկուճ ու կրակոցից վնասված պատուհան էր:
Սեյրան Միրզոյանն այսօր ասաց, որ գյուղում գարնանային գյուղատնտեսական աշխատանքներով են զբաղված, թեև մի քիչ մտահոգություն կա կրակոցների պատճառով, սակայն պնդեց՝ տեղացիներին չեն կարող վախեցնել սրանք:
Չնայած նախորդ շաբաթներին սահմանային Խնածախից ու Խոզնավարից ստացվող լուրերին, որ գյուղերում կրակոցներ են լսում, պաշտպանության նախարար Սուրեն Պապիկյանը խորհրդարանում հայտարարել էր՝ սահմանի երկայնքով կրակոցների դեպքեր լինում են, սակայն դրանք Հայաստանի ուղղությամբ չեն:
Կրակոցների մասին տեղեկությունները հաջորդում են հայ - ադրբեջանական խաղաղության պայմանագրի տեքստի համաձայնեցմանը:
