Ադրբեջանական զինված ուժերի կողմից Խնածախի ուղղությամբ կրակոցներ արձակելու դեպքի առթիվ նախաձեռնվել է քրեական վարույթ, «Ազատությանը» փոխանցեցին Քննչական կոմիտեից:
Մարտի 31-ի գիշերը ադրբեջանական կողմը կրակել էր Սյունիքի մարզի Խնածախ գյուղի ուղղությամբ՝ վնասելով բնակելի տուն:
Քրեական վարույթը նախաձեռնցել է Քրեական օրենսգրքի 44-155-րդ 2-րդ մասի 7-րդ և 15-րդ կետերով (սպանությունը այլ անձանց կյանքի համար վտանգավոր եղանակով, ռասայական, ազգային, էթնիկ կամ սոցիալական ծագումով, կրոնով, սեռով, քաղաքական կամ այլ հայացքներով կամ անձնական կամ սոցիալական բնույթի այլ հանգամանքներով պայմանավորված ատելության, անհանդուրժողականության կամ թշնամանքի շարժառիթով), և 335-րդ հոդվածի 1-ին (ապօրինի կերպով հրազեն (բացառությամբ քաղաքացիական ողորկափող հրազենի, դրա փամփուշտների կամ դրա բաղկացուցիչ մասերի), դրա հիմնական բաղկացուցիչ մաս, ռազմամթերք, ակոսափող հրազենի փամփուշտ, պայթուցիկ նյութ կամ պայթեցման սարք ձեռք բերելը, իրացնելը, պահելը, փոխադրելը, առաքելը կամ կրելը) մասով:
Նշանակվել են դատաձգաբանական և դատաապրանքագիտական փորձաքննություններ:
Խնածախցիներն «Ազատությանը» պատմել էին՝ ձայներն այնքան բարձր էին, կարծես իրենց պատուհանի տակ կրակեին:
