Իրանի նախագահ Մասուդ Փեզեշքիանը հայտարարել է՝ Իսլամական Հանրապետությունը այլ երկրների հետ փոխգործակցելու է փոխադարձության հիման վրա և իրավահավասար դիրքորոշմամբ:
IRNA գործակալության փոխանցմամբ՝ անդրադառնալով տարածաշրջանային և միջազգային խնդիրներին՝ Փեզեշքիանը, նկատի ունենալով ԱՄՆ-ի՝ Թեհրանի վրա «առավելագույն ճնշման» քաղաքականությունն, ընդգծել է, որ Իրանը ցանկանում է հավասար երկխոսություն:
«Եթե ցանկանում եք բանակցություններ, ի՞նչ իմաստ ունի սպառնալ», - ասել է նա:
Իրանը պաշտոնապես մերժել է Միացյալ Նահանգների հետ ուղիղ բանակցությունները՝ նախագահ Դոնալդ Թրամփի նամակին ի պատասխան։ Սպիտակ տան ղեկավարը նախորդ ամսվա սկզբին Թեհրան ուղարկված նամակով առաջարկել էր բանակցել միջուկային ծրագրի շուրջ նոր գործարք կնքելու համար, միաժամանակ սպառնացել, թե դրա այլընտրանքը խնդրի ռազմական լուծումը կլինի։
Պաշտոնավարման առաջին շրջանում նա միակողմանիորեն դուրս եկավ Թեհրանի և 5 գերտերությունների միջև ստորագրված միջուկային գորարքից, այս տարեսկզբին էլ՝ երկրորդ անգամ մտնելով Սպիտակ տուն, հրամանագիր ստորագրեց Իրանի նկատմամբ պատժամիջոցները առավելագույն մակարդակի հասցնելու մասին։
Երեկ էլ ԱՄՆ առաջնորդը հայտարարել էր, թե կարծում է, որ Իրանն ուղիղ բանակցություններ է ցանկանում:
