«Սպիտակ տունը լրջորեն քննարկում է միջնորդավորված բանակցություններ անցկացնելու Իրանի առաջարկը», - դիվանագիտական աղբյուրներ վկայակոչելով՝ հաղորդում է ամերիկյան Axios կայքը։
Ավելի վաղ ամերիկյան կողմն իրանցիներին ուղղակի բանակցություններ կազմակերպելու առաջարկ էր արել, սակայն Թեհրանը մերժել էր այն՝ հայտարարելով, թե ամերիկացիների հետ շփումները կարող են իրականացվել բացառապես Օմանի միջնորդությամբ։
Axios-ի աղբյուրները նշել են, որ թեև ամերիկյան իշխանությունները դեռ չեն մերժել Թեհրանի այս առաջարկը, սական Սպիտակ տանը վստահ են, որ «ուղիղ բանակցություններն ավելի մեծ հնարավորություն կստեղծեն Իրանի միջուկային ծրագրի շուրջ պայմանագիր ստորագրելու համար»։
Թրամփը մարտի 12-ին նամակ է ուղարկել Իրանին՝ առաջարկելով բանակցել միջուկային ծրագրի շուրջ նոր գործարք կնքելու համար, միաժամանակ սպառնալով, թե դրա այլընտրանքը խնդրի ռազմական լուծումը կլինի։
2018 թվականին Թրամփի օրոք ԱՄՆ-ն միակողմանի դուրս եկավ միջուկային համաձայնագրից և պատժամիջոցներ սահմանեց Թեհրանի նկատմամբ։ Հիմա էլ հայտարարում է, թե մտադիր է Իրանի դեմ ճնշումը հասցնել առավելագույն մակարդակի, որպեսզի Թեհրանի հրաժարվի միջուկային նկրտումներից։ Իրանը պնդում է, թե այս պայմաններում բանակցություններն անիմաստ են։
Անցած շաբաթավերջին Իրանը պատասխանեց Թրամփի նամակին։ Երկրի արտգործնախարար Աբբաս Արաղչին հայտարարեց, որ պատրաստ են անուղղակի շփումների՝ մերժելով Միացյալ Նահանգների հետ ուղիղ բանակցությունները։ Ավելի ուշ երկրի նախագահ Մասուդ Փեզեշքիանն ասաց, որ Թեհրանը մերժել է Միացյալ Նահանգների հետ ուղիղ բանակցությունները։
