Ընդդիմադիր պատգամավոր Թագուհի Թովմասյանը պատահական չի համարում, որ Ազգային ժողովի աշխատակազմը դրական եզրակացություն է տվել իշխանական Անդրանիկ Քոչարյանի հարցով էթիկայի հանձնաժողով ստեղծելու իրենց դիմումին: Ընդդիմադիր «Պատիվ ունեմ» ու «Հայաստան» խմբակցություններն արդեն ստացել են աշխատակազմի խորհրդատվական կարծիքը:
«Ակնհայտ է, որ քաղաքական որոշում է եղել տալ մասնագիտական եզրակացություն փորձագետի կողմից, որ անհրաժեշտություն կա ձևավորել էթիկայի հանձնաժողով», - ասաց Թովմասյանը:
Աշխատակազմի եզրակացությունից պատգամավորը ենթադրում է, որ իշխող մեծամասնությունը չի տապալի հանձնաժողով ստեղծելու ընդդիմադիրների նախաձեռնությունն ու կնպաստի, որ Պաշտպանության հանձնաժողովի նախագահի վարքը քննեն:
«Անդրանիկ Քոչարյանի վարքագիծն ակնհայտորեն հակասում է պատգամավորի երաշխիքների մասին օրենքին երկու մասով՝ մեկ, որ հանրության բարոյական նորմերն է խախտել, և երկրորդ՝ լրագրողի հետ խտրական վերաբերմունքի դրսևորման արդյունքում նա ցուցաբերել է անընդունելի խտրական վերաբերմունք», - հայտարարեց Թագուհի Թովմասյանը:
Իշխող մեծամասնության պատգամավոր Քոչարյանը յոթ տարի է՝ խորհրդարանում աչքի է ընկնում ոչ պատշաճ վարքով, վիրավորում է լրագրողներին, ակնհայտ խտրական ու բացասական վերաբերմունք ունի կանանց նկատմամբ, ասում է ընդդիմադիր Թովմասյանը: Հանձնաժողով ստեղծելու առիթը լրագրող Հռիփսիմե Ջեբեջյանի հետ միջադեպն էր: Պատգամավորը պահանջում էր, որ լրագրողը կանգնի իր ուզած տեղում, հակառակ դեպքում սպառնում էր մյուսներին էլ հարցազրույց չտալ, հետո էլ վիրավորեց Ջեբեջյանին:
Լրագրողական կազմակերպությունները պահանջեցին, որ Անդրանիկ Քոչարյանը ներողություն խնդրի, ներողության փոխարեն նա արդարացավ, թե իրեն սխալ են հասկացել. «Դրա մեջ որևէ վիրավորական բան չկա, որևէ, ես ընդամենը արձանագրել եմ, որ պետք է խոսքը օգտագործելիս լինի մաքուր, թե դուք դրա մեջ ինչ եք պատկերացնում, ձեր պրոբլեմն է, եթե սխալ բան եք հասկացել, ամեն մարդ մտածում է իր փչացվածության աստիճանով»:
Իշխող ՔՊ-ն էլ Անդրանիկ Քոչարյանի պահվածքին չանդրադարձավ: Իշխանականներից Քրիստինե Պողոսյանը համարձակվեց իր կարծիքն ասել՝ տգեղ ու վատ որակեց թիմակցի պահվածքը: Պատգամավորը կողմ է, որ էթիկայի հանձնաժողովը ձևավորվի. «Կողմ եմ, որ հանձնաժողովը առհասարակ մշտական լինի, և անհրաժեշտության դեպքում բոլորիս վարքը քննեն»:
Պատգամավորը չմեկնաբանեց հարցը, թե կո՞ղմ է, որ անընդհատ սկանդալի կենտրոնում հայտնվող գործընկերը մանդատը վայր դնի ու հեռանա խորհրդարանից, ինչպես եղավ ՔՊ-ական Վիլեն Գաբրիելյանի դեպքում, ով լքեց Ազգային ժողովը անսթափ վիճակում լրագրողին հայհոյելուց հետո:
Պատգամավոր Թովմայսանը հույս ունի, որ Անդրանիկ Քոչարյանի հարցը կհասնի առաջիկա լիագումար նիստին: Նախ Քոչարյանի վարքը քննելու մասին էթիկայի հանձնաժողով ստեղծելու նախագիծը Պետաիրավական հանձնաժողովում կքննարկեն, որից հետո լիագումար նիստում: Միայն ընդդիմադիրների ձայները բավարար չեն, որ նախագիծն ընդունվի, Անդրանիկ Քոչարյանի թիմակիցներն էլ պետք է կողմ քվեարկեն:
Հարցին՝ իսկ եթե տապալե՞ն, Թովմասյանը պատասխանեց. «Նշանակում է, որ «Քաղաքացիական պայմանագիր» խմբակցությունը հովանավորում է այդ վարքագիծը, ինչը ցուցաբերում է Անդրանիկ Քոչարյանը, անընդունելի, լկտի վարքագիծ լրագրողի նկատմամբ»:
