«Քաղաքացիական պայմանագրի» վարչությունը պատգամավորի մանդատից հրաժարված Վիլեն Գաբրիելյանին կուսակցությունից հեռացնելու հարց չի քննարկում, նման մտադրություն էլ չունեն, «Ազատությանը» կարճ փոխանցեց վարչության անդամ Ռոմանոս Պետրոսյանը:
«Ինքը շարունակում է մնալ կուսակցության անդամ: Նման կարգապահական որևէ վարույթ այս պահին չկա», - ասաց նա:
«Քաղաքացիական պայմանագրի» անդամ Գաբրիելյանը աղմկահարույց պատմության մեջ հայտնվեց Գյումրիի ընտրությունների օրը: Անսթափ վիճակում վիճել էր լրագրողների հետ, կոպիտ հայհոյել «Եվրամեդիա»-ի լրագրողին: Միջադեպից երկու օր չանցած ՔՊ-ական պատգամավորը որոշեց մանդատը վայր դնել, ներողություն խնդրեց հանրությունից: Իսկ լրագրողին հայհոյելու համար Վիլեն Գաբրիելյանը, պարզվեց, չի ափսոսում: Երեկ Factor.TV-ի հետ կարճ զրույցում պնդել է, թե դա եղել ի պատասխան շանտաժի:
Միջադեպի մասնակից լրագրող Կորյուն Սիմոնյանը, մինչդեռ, պնդում է, թե պատգամավորը ստում է, շանտաժի մասին խոսք լինել չի կարող, իսկ ինքը նկարել և հրապարակել է, թե ինչպես է իշխանության ներկայացուցիչը հարբած փողոցում հասարակական կարգ խախտում: Սոցիալական ցանցի իր էջում «Եվրամեդիայի» լրագրողը ՔՊ-ականի ասածը զրպարտություն է որակել: Այն, որ փողոցում իշխանական Գաբրիելյանը պատգամավորին ոչ հարիր վարք է դրսևորել, թիմակիցներն ընդունում են, բայց և հավելում՝ իրենց գործընկերը հարգանքի է արժանի, որ քաղաքական պատասխանատվություն է դրսևորել և հրաժարվել մանդատից:
«Ես կարծում եմ՝ դա շատ անհատական անձի որոշումն է, ու լինում են իրավիճակներ, երբ մարդը մտածում է, որ սա սահմանն է, և այլևս դրանից հետո նպատակահարմար չի գտնում շարունակել պատգամավորական գործունեությունը: Ես շատ բարձր եմ գնահատում պարոն Գաբրիելյանի քայլը», - նշեց ԱԺ արտաքին հարաբերությունների հանձնաժողովի անդամ Սարգիս Խանդանյանը:
Արդյոք կուսակցի որոշումը ողջունելու համար է սոցիալական ցանցի իր էջում Վիլեն Գաբրիելյանի հետ լուսանկարներ հրապարակել Ազգային ժողովի նախագահը՝ Ալեն Սիմոնյանը չի բացատրել, բայց նրա հրապարակումը լայքել են մի շարք ՔՊ-ականներ: Ու թեև Գաբրիելյանը երեկվա հարցազրույցում մի քանի անգամ շեշտեց, թե չի զղջում լրագրողին հայհոյելու համար, միևնույն է՝ կուսակցությունից բացառում են՝ նրան ՔՊ շարքերից հեռացնելու հեռանկարը:
«Իհարկե, չի կարող նման բան լինել, Վիլենը մեր կուսակցության հիմնադիր անդամներից չէ, ու իհարկե ինքը մնալու է: Վիլենն այդ կուսակցությունն իրենն է համարում, ինչպես ցանկացածս, ով այդ ճանապարհն անցել է հիմնադրման պահից», - շեշտեց ՔՊ-ից պատգամավոր Քրիստինե Պողոսյանը:
Անցած տարվա դեկտեմբերին «Քաղաքացիական պայմանագրի» վարչության որոշմամբ կուսակցությունից հեռացվեց պատգամավոր Հովիկ Աղազարյանը, բացատրություններից մեկն էլ հանրության բարոյական նորմերի կոպիտ խախտումն էր: Արդյոք Վիլեն Գաբրիելյանը չի խախտել այդ բարոյական նորմերը, երբ փողոցում հայհոյել է. ՔՊ-ական Քրիստինե Պողոսյանը կարծում է՝ համեմատությունը տեղին չէ:
«Տարբերությունը մեծ է՝ պարոն Աղազարյանը չէր գիտակցում իր սխալները, իսկ Վիլենը և՛ գիտակցել է, և՛ քաղաքական պատասխանատվություն է կրել: Չի կարող առողջանալ մեր երկրում քաղաքական մթնոլորտը, եթե քաղաքական գործիչները չգիտակցեն քաղաքական պատասխանատվության մասին», - նկատեց նա:
Պատգամավորը հեռանալուց հետո խոստացել է զբաղվել նաև սեփական կուսակցության առողջացմամբ: Կուսակիցները ողջունում են նրա որոշումը:
«Այո, խնդիր կա, և ես ուրախ եմ, որ Վիլենը այս ամեն ինչից հետո նման լուրջ պատասխանատվություն է իր վրա վերցնում՝ օգնելու կուսակցությանն ավելի առողջանալու», - հավելեց Քրիստինե Պողոսյանը:
Եթե 1 շաբաթվա ընթացքում Վիլեն Գաբրիելյանը մանդատից հրաժարվելու դիմումը հետ չվերցնի, նրա լիազորությունները կդադարեցվեն: Հնարավո՞ր է Գաբրելյանը մտափոխվի, հարցի պատասխանը պատգամավորից ստանալ չհաջողվեց:
