«Քաղաքացիական պայմանագրի» պատգամավոր Վիլեն Գաբրիելյանը վայր է դրել մանդատն ու ներողություն խնդրել հանրությունից:
«Անցած կիրակի Գյումրի քաղաքում իմ մասնակցությամբ այսպես ասած միջադեպերը համարում եմ ոչ վայել Հայաստանի Հանրապետության Ազգային Ժողովի պատգամավորի վարքին», - հայտարարել է նա:
Պաշտպանության և անվտանգության հանձնաժողովի անդամը Գյումրիում ընտրությունների օրը անսթափ վիճակում վիճել էր լրագրողի հետ ու հայհոյել նրան:
Այդ օրը լրագրողները պահանջում էին, որ ներողություն խնդրի, հրաժարվի մանդատից, իշխանականը դա անիմաստ էր համարել, քանի որ, իր կանխատեսումներով, մեկ տարի հետո իշխանությունը փոխվելու է:
«26-ին իշխանությունը փոխվելու է, էլ խի՞ եմ ես մանդատս վայր դնում», - ասել էր նա:
Վիլեն Գաբրիելյանը մանդատը վայր է դրել ոչ թե անվայելուչ վարքի, այլ այն խոսքերի պատճառով, որ հաջորդ տարի իշխանությունը փոխվելու է, համոզված է ընդդիմադիր «Հայաստան» խմբակցության պատգամավոր Արթուր Խաչատրյանը:
«Կներվեր իր պահվածքը, բայց չի ներվի իր հայտարարությունը, որ 26 թվականին իշխանություն է փոխվելու», - «Ազատությանն» ասաց նա, - «Այդ արտահայտության համար էր պատիժը, դա է պատճառը»:
Սկանդալային պատմությամբ խորհրդարանից հեռացող պատգամավորը հիմա էլ մտադիր է ՔՊ-ն առողջացնել: Փաշինյանի գլխավորած կուսակցությունը առողջացման ու կերպարանափոխման կարիք ունի, հրաժեշտի տեքստում գրել է Գաբրիելյանն ու հայտնել, որ առաջադրվելու է կուսակցության ղեկավար մարմնի՝ վարչության ընտրություններում:
Վիլեն Գաբրիելյանի՝ մանդատը վայր դնելու քայլն օրինակելի է. Աշոտ Մելիքյան
Վիլեն Գաբրիելյանի քայլն օրինակելի է համարում Խոսքի ազատության կոմիտեի նախագահ Աշոտ Մելիքյանը, ասաց՝ լրագրողներին թիրախավորող բոլոր պաշտոնյաներն ու քաղաքական գործիչները պետք է հետևեն նրան:
«Ես կարծում եմ, որ եթե մարդն ի վերջո սխալվում է, բայց իր սխալն ընդունում է, դա կարևոր հատկանիշ է, ինչն ամենևին էլ տարածված չէ մեր քաղաքական ասպարեզում», - հավելեց նա:
Մելիքյանն այդպիսի քայլ չի սպասում լրագրողներին վիրավորելու պատմություններով հայտնի Անդրանիկ Քոչարյանից, նա անգամ ներողություն չի խնդրում: Պաշտպանության հանձնաժողովի ղեկավարը օրեր առաջ վիրավորել էր լրագրող Հռիփսիմե Ջեբեջյանին ու ներողության փոխարեն արդարացել, թե իրեն սխալ են հասկացել: «Ընդամենը ես արձանագրել եմ, որ պետք է խոսքը օգտագործելուց լինի մաքուր», - ասել էր իշխանական պատգամավորը:
Իշխող թիմում լրագրողին թիրախավորելու սկանդալից հետո հրաժարական եղել էր երեք տարի առաջ: Բարձր տեխնոլոգիաների նախարար Հակոբ Արշակյանն էր հարվածել լրագրող Փայլակ Ֆահրադյանին: Ավելի ուշ նա դատապարտեց բռնությունն ու հրաժարական տվեց: Ազգային ժողովի նախագահ Ալեն Սիմոնյանն էլ թքել էր քաղաքացու վրա, մեծ աղմուկից հետո Հայաստանի բոլոր քաղաքացիներից ներողություն խնդրեց, բայց մանդատից չհրաժարվեց:
