Երկու ժամից Սյունիքի դատարանը կհրապարակի 44-օրյա պատերազմի գործով մեղադրյալ, Արցախի Պաշտպանության բանակի նախկին հրամանատար Ջալալ Հարությունյանի դատավճիռը: Դատարանը արդեն մեղավոր է ճանաչել գեներալ-լեյտենանտին՝ պատերազմի ժամանակ զինվորական ծառայության նկատմամբ անփույթ վերաբերմունքի համար: Դատախազը երեկ պահանջեց 50-ամյա Հարությունյանին ազատազրկել 6 տարով:
«Կան մեղավորներ, բայց պարոն Հարությունյանը նրանց ցանկում չէ: Ունենք մի իրավիճակ, որ անձը, որ ստանձնել է ՊԲ հրամանատարի պատասխանատվությունն ու բեռը, դրա համար է պատասխան տալիս», - ասում է փաստաբան Արսեն Սարդարյանը:
Ջալալ Հարությունյանը մեղադրվում է սխալ հրաման տալու համար: Իրավապահները պնդում են՝ հենց նրա գործողությունների հետևանքով է Ցորի զորամասի 20 զինվոր հայտնվել հակառակորդի թիրախում ու սպանվել, երբ փորձել են ճշտել, թե առջևից եկողները հայերն են, թե ադրբեջանցիները: Գեներալ-լեյտենանտի պաշտպան Արսեն Սարդարյանը չի հերքում, որ Հարությունյանն ասել է նման բան:
«Այստեղ ոչ մեկը չի ասում՝ հետախուզությունը ինչ զեկուցել է, դա էլ պետք է ասեր: Երկրորդը՝ որևէ ապացույց բացի մեկ անձի ցուցմունքից, որ Ջալալ Հարությունյանի կողմից է ասվել՝ «մերոնք», չկան: Ջալալ Հարությունյանն ասում է՝ «ես ասել եմ՝ պետք է, որ մերոնք լինեն, կարող է մերոնք լինեն», ու եղել են դրա համար համար բավարար տվյալներ»:
Հարությունյանը երեկ չցանկացավ խոսել «Ազատության» հետ, դեմ էր նաև, որ նիստը տեսանկարահանվի:
Մինչ փաստաբանը պնդում է՝ գեներալ-լեյտենանտի մեղքով չեն զոհվել զինվորները, ու իրավապահները պետք է քննության առնեին հենց դիվիզիոնի հրամանատարության գործողությունները, անհետ կորած զինվոր Հայկ Մելիքյանի մայրը գոհ է քննությունից
«Այդ սխալի հրամանի հետևանքով են տղաները… գոնե եթե իրենք այդ պահին, երբ դիվիզիոնի հրամանատարական կազմն ասում էր, որ «մենք հիմա գնանք, մի տեղ պատսպարվենք, եթե կպարզվի՝ յուրային են, հետ կգանք», և անգամ դա իրենց թույլ չեն տվել՝ պնդելով, որ «մերոնք են» և վերջ: Այդպես խումբը եկել է, և տեղի է ունեցել այդ սարսափելի ողբերությունը», - ասաց Նաիրա Մելիքյանը:
Ջալալ Հարությունյանն առաջին բարձրաստիճան զինվորականն է, որի դատաքննությունը երկուսուկես տարի անց մոտեցավ ավարտին: 44-օրյա պատերազմի գործերով մեղադրյալի աթոռին են նաև Արցախի Պաշտպանության բանակի նախկին հրամանատար Միքայել Արզումանյանը, Հայաստանի Զինված ուժերի գլխավոր շտաբի պետի առաջին տեղակալ Տիրան Խաչատրյանը, պետի տեղակալ Անդրանիկ Մակարյանը: Նրանք ևս մեղադրանքը չեն ընդունում:
