Նախկին ՔՊ-ական Հովիկ Աղազարյանին ու ընդդիմադիր «Պատիվ ունեմ» խմբակցության պատգամավոր Տարոն Մարգարյանին անձեռնմխելիությունից զրկելու հարցը ամենայն հավանականությամբ կորոշեն միայն իշխանական պատգամավորները:
«Քաղաքացիական պայմանագրից» Ալխաս Ղազարյանն չթաքցրեց՝ մտադիր են բավարարել գլխավոր դատախազի երկու միջնորդությունները:
«Դե եթե կարիքը հասել է դրան, որ պետք է դատախազը գա Ազգային ժողով, բնականաբար, պետք է տալ», - ասաց Ղազարյանը:
Գլխավոր դատախազ Աննա Վարդապետյանն անցած շաբաթ երկու ծավալուն միջնորդություն է ուղարկել խորհրդարան, ակնկալում է պատգամավորների համաձայնությունը ստանալ, որ Հովիկ Աղազարյանին և Տարոն Մարգարյանին մեղադրանք առաջադրեն: Ըստ մամուլի՝ ընդդիմադիր «Պատիվ ունեմ»-ը ոչ հարցի քննարկմանը, ոչ էլ քվեարկությանը չի մասնակցի:
Խմբակցության ղեկավար Հայկ Մամիջանյանը կարճ փոխանցեց. - «Կուսակցությունը հանդես կգա հայտարարությամբ»:
Եթե «Պատիվ ունեմ»-ը քննարկմանը չմասնակցի, ապա «Հայաստան» խմբակցությունը նույնպես Տարոն Մարգարյանի միջնորդության քննարկումը բաց կթողնի: Իսկ Հովիկ Աղազարյանի վերաբերյալ հնարավոր է՝ այլ որոշում կայացնեն, «Ազատությանն» ասաց ընդդիմադիր պատգամավոր Աննա Գրիգորյանը:
«Դեռ վերջնական որոշում չունենք, միգուցե և մասնակցենք այդ հարցով քննարկմանը», - նշեց Գրիգորյանը:
Ինքը՝ Հովիկ Աղազարյանը, գրեթե կասկած չունի՝ նախկին թիմակիցները կողմ կքվեարկեն իրեն անձեռնմխելիությունից զրկելու դատախազի միջնորդությանը:
Ինքն էլ իր հերթին է պատրաստ այդ այցին, բացահայտումներ է խոստանում, կպատմի, թե ինչու իրավապահները իրեն հանգիստ չեն տալիս:
«Ինձ ենթարկում են քաղաքական ճնշումների, որ մանդատը վայր չդրեցին, և պարոն վարչապետն ու քաղաքական թիմը գտնում են, որ դա իշխանության հեղինակությանը հարված է: Երկրորդ պատճառը՝ որպեսզի իմ նախկին գործընկերներից ոմանց սանձահարեն», - նշեց Աղազարյանը:
Հովիկ Աղազարյանը, ինչպես ինքն իրեն նկարագրեց, չսանձվող տեսակ է, անգամ կալանքի հնարավոր հեռանկարն, ասում է՝ իրեն չի վախեցնում, դրան էլ է պատրաստ. - «Ես ինչ որ պիտի ասեմ, ասելու եմ, թեկուզ կալանքի վայրում էլ լինեմ, էլի ասելու եմ: Երազում եմ, որ այն անհանգստությունները, որ ունեմ, սխալված լինեմ, թեկուզ դրա համար մի 8 ամսի էլ կալանքի տակ լինեմ»:
Աղազարյանին առնչվող քրեական գործով կասկածներ կան, որ պատգամավորը խոշոր չափի կաշառքի դիմաց խոստացել է կազմակերպել մանր եղջերավորների արտահանումը առանց կարանտինի: Աղազարյանը պնդում է, թե ինքն անօրինական ոչինչ չի արել, պարզապես իրեն մանդատից զրկելու հարցը դեռ Նիկոլ Փաշինյանի օրակարգում է:
Ամիսներ առաջ, երբ Աղազարյանը մերժեց մանդատը վայր դնելու վարչապետի հորդորը, նրան թիմակիցները հեռացրին կուսակցությունից ու խմբակցությունից: Մեղադրեցին կուսակցական փակ նիստերից արտահոսքեր կազմակերպելու, այդպես նաև հայ-ադրբեջանական բանակցային գործընթացը վնասելու համար: Քրեական գործ էլ հարուցվեց՝ ենթադրյալ պետական գաղտնիք հրապարակելու հոդվածով, բայց մինչ օրս այս գործով տեղաշարժ չկա:
Ըստ Աննա Գրիրգորյանի՝ եթե այլ ՔՊ-ականներ ևս հակադրվեն վարչապետին, ապա կհայտնվեն նույն իրավիճակում
«Եթե Հովիկ Աղազարյանը մանդատը դներ, գնար, կամ այլ իրավիճակում լիներ, շարունակեր լինել ՔՊ-անդամ երբևէ դատախազը չէր մտնի նման միջնորդությամբ: Այդ քրեական գործերը նոր չէին ձևավորվել, բայց երևան եկան, հրապարակային դարձան բացառապես այն բանից հետո, երբ Հովիկ Աղազարյանը հրաժարվեց մանդատը դնել ու դուրս գալ», - նշեց Աննա Գրիգորյանը:
Ընդդիմադիր «Հայաստան» խմբակցությունից Աննա Գրիգորյանի կարծիքով՝ եթե այլ ՔՊ-ականներ ևս հակադրվեն վարչապետ Նիկոլ Փաշինյանին, ապա կհայտնվեն նույն իրավիճակում: Հիշեցնում է արդեն տևական ժամանակ քննվող քովիդի, ԱՆԻՖ-ում միլիոնավոր դոլարների չարաշահումների գործերը, որոնց վերաբերյալ նաև ՔՊ-ականների անուններ են շրջանառվում:
«Բազմաթիվ հրապարակումներ կան, որոնք առնվազն պետք է հիմք դառնային, որպեսզի Տիգրան Ավինյանը, մյուսները, ովքեր բարձր պաշտոններ են զբաղեցրել, ներգրավվեին ինչ-որ կարգավիճակով, բայց ներգրավված չեն, ինչը նշանակում է՝ ամենաբարձր մակարդակով, Նիկոլ Փաշինյանի մակարդակով ծածկադմփոց է իրականացվում, հովանավորչություն է իրականացվում, որպեսզի այն մարդիկ, ովքեր դեռ իր անմիջական ազդեցության գոտում են, ոչ մի քրեական ու իրավական պատասխանատվություն չկրեն», - ասաց Գրիգորյանը:
Ի տարբերություն Հովիկ Աղազարյանի՝ լուռ է Տարոն Մարգարյանը: Նրան առնչվող քրեական գործը, որ վերաբերում է Երևանում մանկապարտեզների ու դպրոցների տարածքների ապօրինի օտարման դեպքերին, քաղաքական է համարում Հանրապետական կուսակցությունը:
