Հնդկաստանում Իրանի դեսպան Մոհամմադ Ֆաթհալին հայտարարել է, որ Թեհրանը հնդկական մի քանի նավի թույլ է տվել անվտանգ անցնել Հորմուզի նեղուցով, որն Իրանը փակ է պահում արդեն երկու շաբաթ։ Դեսպանը, սակայն, չի մանրամասնել, թե քանի նավի մասին է խոսքը։
Երեկ էլ Իրանը թուրքական մի նավի էր թույլ տվել անցնել նեղուցով, որտեղով պատերազմից առաջ անցնում էր աշխարհում սպառվող նավթի և նավթամթերքի մոտ 20 տոկոսը։
Իսրայելի պաշտպանության նախարարը հայտարարել է, որ Իրանի հետ արդեն երկու շաբաթ ընթացող հակամարտությունը մտնում է «վճռական փուլ»։
Իսրայել Կացը նաև շնորհավորել է Դոնալդ Թրամփին երեկ երեկոյան Իրանի կարևորագույն նավթային կղզուն՝ Խարգին, «ծանր հարված» հասցնելու համար՝ այն անվանելով «Հորմուզի նեղուցի ականապատ տարածքներին համարժեք պատասխան»։
Կացը նաև ասել է, որ Իսրայելի ռազմաօդային ուժերը «շարունակում են Թեհրանի և ամբողջ Իրանի վրա հարձակումների հզոր ալիքը», բայց ընդգծել է, որ միայն Իրանի ժողովուրդը կարող է վերջ դնել հակամարտությանը՝ տապալելով գործող ռեժիմը։
Իրանի Իսլամական հեղափոխության պահապանների կորպուսի ռազմածովային ուժերի հրամանատար, ծովակալ Ալիռեզա Թանգսիրին հայտարարել է, որ իրանական ռազմածովային ուժերը հարվածների «մի քանի շարունակական ալիքներ» են սկսել Արաբական Միացյալ Էմիրությունների ալ-Զաֆրայում, Քուվեյթի ալ-Ադիրիում և Բահրեյնի Շեյխ Իսայում գտնվող ռազմաբազաներում տեղակայված ամերիկյան ուժերի դեմ։
Թանգսիրիի խոսքով՝ իրանական ուժերը թիրախավորել են Patriot ռադարային համակարգերը, ինքնաթիռները և ինքնաթիռների վառելիքի պահեստավորման բաքերը։
Իրանի Կարմիր մահիկի տվյալներով՝ ԱՄՆ-ի և Իսրայելի համատեղ հարձակումների սկսվելուց ի վեր Իրանում ավելի քան 36 հազար 500 քաղաքացիական շենք-շինություն վնասվել է։
Ըստ Իրանի կառավարության՝ դրանց թիվը հասնում 43 հազարի:
Իրաքի մայրաքաղաք Բաղդադում գտնվող ԱՄՆ դեսպանատունը հրթիռային հարձակման է ենթարկվել, ինչից հետո շենքից ծուխ է բարձրացել։
Իրաքի անվտանգության ծառայության աղբյուրը Al Jazeera-ին հայտնել է, որ հարվածի հետևանքով ոչնչացվել է իր հակաօդային պաշտպանության համակարգի մի մասը։ Այլ մանրամասներ աղբյուրը չի հաղորդել։
Associated Press-ն էլ դեսպանատան անվտանգության աշխատակիցներին հղումով հայտնում է, որ հրթիռը հարվածել է դեսպանատան ուղղաթիռի վայրէջքի հրապարակին։
ԱՄՆ դեսպանատունը գտնվում է Բաղդադի Կանաչ գոտում, որը քաղաքի կենտրոնական մասում տեղակայված և ուժեղ ամրացված թաղամաս է։ Այստեղ են գտնվում Իրաքի կառավարական հաստատությունները և օտարերկրյա դեսպանատները, հավելել են անվտանգության աշխատակիցները, որոնք չեն ներկայացել։
ԱՄՆ դեսպանատնից անմիջապես մեկնաբանություն չի եղել։ Դեռ չի հաղորդվում, թե արդյոք հարձակման հետևանքով կան զոհեր։ Հասցված վնասի ճշգրիտ չափը ևս հայտնի չէ։
ԱՄՆ կենտրոնական հրամանատարությունը հայտարարել է, որ Խարգ կղզում հարձակումների ժամանակ ռազմական 90 թիրախ է ոչնչացրել «լայնածավալ ճշգրիտ հարվածների» շնորհիվ։
Հրամանատարությունը X-ում հայտնել է, որ ոչնչացրել են «ռազմածովային ականների պահեստներ, հրթիռների պահեստային բունկերներ և բազմաթիվ այլ ռազմական օբյեկտներ» ու զերծ են մնացել նավթային ենթակառուցվածքներին հարվածելուց։
Միացյալ Նահանգների Պետդեպարտամենտը երեկ 10 միլիոն դոլար պարգև է խոստացել Իրանի նոր գերագույն առաջնորդ Մոջթաբա Խամենեիի և այլ բարձրաստիճան պաշտոնյաների մասին տեղեկատվության համար:
Ցուցակում տասը մարդ է ընդգրկված, սակայն նշված են նրանցից միայն վեցի անունները՝ Իրանի Ազգային անվտանգության գերագույն խորհրդի քարտուղար Ալի Լարիջանի, հետախուզության նախարար Իսմայիլ Խաթիբ, ներքին գործերի նախարար Էսկանդար Մոմենի, գերագույն առաջնորդի ռազմական գծով ավագ խորհրդական Յահյա Սաֆավի և գերագույն առաջնորդի վարչակազմի ղեկավար Ալի Ասղար Խեջազի:
«Այդ անձինք հրամանատարներ են և ղեկավարում են Իսլամական հեղափոխության պահապանների կորպուսի տարբեր ստորաբաժանումներ, որոնք ծրագրում, կազմակերպում և իրականացնում են ահաբեկչական ակտեր ամբողջ աշխարհով մեկ», - ասված է հայտարարությունում:
Իրանի Իսլամական հեղափոխության պահապանների կորպուսը հայտարարել է, որ ամերիկյան ուժերի հարվածների ժամանակ Խարգ կղզում շուրջ 15 պայթյուն է լսվել, թիրախավորվել են ծովային ռազմակայանը, դիսպետչերական աշտարակը և ուղղաթիռի հարթակը: Հաղորդագրության համաձայն՝ կղզու հակաօդային պաշտպանության համակարգը հարձակումից մեկ ժամ անց վերսկսել է աշխատանքը:
ԻՀՊԿ-ն հաստատել է, որ կղզու նավթային ենթակառուցվածքները չեն տուժել:
«Իրանը զգուշացրել է երկրի էներգետիկ ենթակառուցվածքին հարվածների հետևանքների մասին. այդ դեպքում տարածաշրջանի ամբողջ նավթագազային ենթակառուցվածքը, որով շահագրգռված են ԱՄՆ-ը և նրա դաշնակիցները, հրի կմատնվի և կոչնչացվի», - ասված է հաղորդագրությունում:
Միացյալ Նահանգների նախագահ Դոնալդ Թրամփը հայտարարել է, որ ամերիկյան ուժերը Մերձավոր Արևելքի պատմության մեջ «հզորագույն ռմբակոծություններից մեկով ամբողջությամբ ոչնչացրել են» ռազմական օբյեկտները Իրանի ռազմավարական Խարգ կղզու վրա, և ԱՄՆ նավատորմը շուտով կուղեկցի նավերը Հորմուզի նեղուցով:
«Րոպեներ առաջ իմ ցուցումով Միացյալ Նահանգների Կենտրոնական հրամանատարությունն իրականացրեց Մերձավոր Արևելքի պատմության մեջ հզորագույն ռմբակոծություններից մեկը և ամբողջությամբ ոչնչացրեց ամեն մի ՌԱԶՄԱԿԱՆ թիրախ Իրանի թագի գոհարի՝ Խարգ կղզու վրա», - գրել է Թրամփը իր Truth Social սոցցանցում:
«Մեր զենքերն ամենահզորն են և ամենակատարյալը, որ Աշխարհին երբևէ հայտնի են եղել, սակայն, պարկեշտության նկատառումներով, ես որոշեցի Չվերացնել Նավթային Ենթակառուցվածքները կղզու վրա», - հավելել է ԱՄՆ նախագահը՝ այնուհանդերձ զգուշացնելով, որ եթե Իրանը «կամ որևէ այլ մեկը» որևէ քայլ անի՝ խոչընդոտելու նավագնացությունը Հորմուզի նեղուցով, ինքը կվերանայի իր որոշումը:
Իրանի ափից մոտ 25 կմ և Հորմուզի նեղուցից շուրջ 480 կմ հեռու գտնվող Խարգ կղզում է երկրի նավթի 90 տոկոսի արտահանման տերմինալը:
ԱՄՆ-ն կշարունակի հարվածել Իրանին և այսօր պատերազի ընթացքում ամենաինտենսիվ հարվածները կհասցվեն, ռազմարշավի 14-րդ օրը կայացած ճեպազրույցի ժամանակ հայտարարել է ԱՄՆ պաշտպանության նախարարը:
Փիթ Հեգսեթը հայտնել է, որ Իրանում առ այսօր 15,000 թիրախի են հարվածել և ոչնչացրել են նրանց հարձակողական կարողությունների մեծ մասը, շուտով կոչնչացվեն նաև պաշտպանության ոլորտի բոլոր ընկերությունները, որպեսզի չկարողանան զենք արտադրել:
Նախարարի պնդմամբ՝ Իրանի ղեկավարությունը հուսահատված է և թաքնվել է գետնի տակ, ինչպես անում են «առնետները»։ ԱՄՆ-ն տեղյակ է, որ Իրանի նոր գերագույն առաջնորդը վիրավոր է, հավանաբար, այլանդակված, դրա համար էլ խուսափում է երևալ հանրությանը և առաջին ուղերձը տեքստային էր, ոչ թե տեսանյութ:
«Նրա հայրը մահացած է։ Նա վախեցած է, վիրավոր, փախուստի մեջ է և զուրկ լեգիտիմությունից։ Սա խառնաշփոթ է նրանց համար։ Ո՞վ է պատասխանատու Իրանում։ Նույնիսկ Իրանը կարող է չիմանալ դա», - նշել է Փիթ Հեգսեթը։