Գերմանիայի կանցլեր Օլաֆ Շոլցը վրացի պաշտոնակից Իրակլի Կոբախիձեի հետ համատեղ ասուլիսում նշել է, որ Գերմանիային մտահոգում է Վրաստանում «օտարերկրյա ազդեցության» մասին օրինագիծը վերստին օրակարգ բերելու հանգամանքը:
Շոլցի համոզմամբ` Վրաստանի կառավարությունը պետք է հրաժարվի այդ նախաձեռնությունից, ինչպես արդեն արել է նախկինում:
Գերմանիայի կանցլերն ավելացրել է, թե դա կարևոր է, որ Վրաստանում առաջիկա ընտրությունները լինեն ազատ և արդար, հատկապես հաշվի առնելով Եվրամիությանն անդամակցելու հարավկովկասյան երկրի ձգտումը:
Կոբախիձեն պատասխանել է, որ «թափանցիկության օրենքը կառավարությանը տալիս է դրսից ֆինանսավորվող ՀԿ-ների հաշիվներն ընդամենը տարեկան մեկ անգամ ստուգելու իրավունք, և զարմանալի չէ, որ երկրում ժողովրդավարական գործընթացների վրա ազդելու ցանկություն ունեցող օտարերկրյա դերակատարները դեմ են այդ օրենքին»:
«Մենք ունենք մեր հասարակական կազմակերպություններից նվազագույն աստիճանի թափանցիկություն ակնկալելու իրավունք», - ասել է Վրաստանի վարչապետը:
